TOShKENT, 30 yanv - Sputnik. "Xalqaro armiya o‘yinlari — 2019" tanlovining "Harbiy-tibbiy estafeta" yo‘nalishi O‘zbekiston hududida birinchi marta o‘tkaziladi, deb xabar qildi Mudofaa vazirligi matbuot-xizmati.
O‘zbekiston hududida birinchi marotaba o‘tkazilishi rejalashtirilayotgan Xalqaro armiya o‘yinlari Jizzax viloyatidagi “Forish” tog‘-dala o‘quv maydonida o‘tkazilishi rejalashtirilmoqda.
O‘tgan yilgi "ArMI—2018" o‘yinlari Ozarbayjon, Armaniston, Belarus, Eron, Qozog‘iston, Xitoy va Rossiya kabi davlatlarda 28 yo‘nalish bo‘yicha o‘tkazilgan bo‘lib, unda dunyoning 32 mamlakatidan kelgan harbiylar ishtirok etgan edi. O‘zbekiston Mudofaa vazirligi harbiy xizmatchilari esa 12 yo‘nalishda qatnashib, umumjamoa hisobida 6-o‘rinni qo‘lga kiritgan.
O‘tgan yilgi o‘yinlarda "Harbiy-tibbiy estafeta" bellashuvida ishtirok etgan o‘zbekistonlik harbiy xizmatchi, Mudofaa vazirligi Markaziy harbiy poliklinika terapevt-shifokori, tibbiy xizmat kapitani Larisa Xolmamatova harbiy shifokorlar o‘rtasida o‘tkazilayotgan "Maxsus ko‘nikmalar" yakkalik bahsida ikkinchi o‘rinni qo‘lga kiritgan edi.