TOShKENT, 12 dek – Sputnik. 10-dekabr kuni o‘zbekistonlik mehnat migrantlarining birinchi guruhi Sofiya shahriga yetib keldi, deb xabar qilmoqda Nuz.uz nashri.
O‘zbekistonlik mehnat migrantlari Bolgariyada eng katta bo‘lgan “SI Commercial 7” qandolat fabrikasida mehnat qilishadi. O‘zbekistonlik ishchilar ushbu uzoq yurtdan ish topishiga Tashqi mehnat migratsiyasi agentligi va Bolgariyaning “Excellence Solutions Group” kompaniyalari orasida imzolangan shartnoma sabab bo‘ldi.
Ishchi yollovchi kompaniya direktori Renata Kruz o‘zbekistonlik migrantlar Bolgariya fabrikasida o‘zlarining “mehnatsevarliklarini, ozodaliklarini va ishchanliklarini” namoyish qilishlariga umid qilmoqda.
Shu bilan birga Bolgariya kompaniyasi O‘zbekiston Mehnat vazirligining Tashqi mehnat migratsiyasi agentligiga o‘zbekistonlik ishchilarning hujjatlarini rasmiylashtirishda va Yevropa qonunchiligiga muvofiqlashtirishda ko‘rsatgan yordami uchun minnatdorlik bildirdi.