TOShKENT, 19 sen - Sputnik. Tojikistonning So‘g‘d garnizonida O‘zbekiston-Tojikiston qo‘shma harbiy mashg‘ulotlarning birinchi kuni yakunlandi, deb xabar qilmoqda Mudofaa vazirligi matbuot xizmati.
So‘g‘d viloyatidagi “Choruxdayron” poligonida o‘tkazilayotgan “Jangovar hamdo‘stlik—2018” o‘quvlarining birinchi kuni o‘z nihoyasiga yetdi.
Hamkorlikdagi o‘quv mashg‘ulotlarning birinchi kunida tezkor guruh shtabi tashkil etildi. Tojikiston mudofaa vazirining birinchi o‘rinbosari – Bosh shtabi boshlig‘i general-leytenant Emomali Sobirzoda tomonidan ushbu guruh faoliyati muvofiqlashtirilib, dala o‘quv maydonidagi amaliy mashg‘ulotlar bilan parallel ravishda ishlar olib borilishi ta’minlandi. .
O‘zbekiston harbiylari tomonidan jangovar texnikalar, uchuvchisiz uchish apparatlari, 6 ta minomot hamda 2 ta H215 vertolot qo‘llanilib, taktik harakatlar muvaffaqiyatli amalga oshirildi.
Mashqlar jarayonida dastlab noqonuniy qurollangan terrorchi guruhlar joylashgan hudud to‘g‘risidagi ma’lumotlar o‘zbekistonlik harbiylar (uchuvchisiz uchish apparatlari yordamida) tomonidan yuqori qo‘mondonlikka yetkazildi.
Hamkorlikda “Dushman shaharcha”siga hujum uyushtirildi. O‘zbekistonlik harbiylar zirhli texnikalarda belgilangan yo‘nalish bo‘yicha ishonchli harakatlanib, shartli dushman joylashgan obyektni egalladi. Shartli dushman kelish ehtimoli bo‘lgan yo‘nalishga esa O‘zbekiston va Tojikiston Havo hujumidan mudofaa qo‘shinlari va harbiy havo kuchlarining vertolot aviatsiyalari tomonidan taktik desantlashtirish ishlari amalga oshirildi.
Eslatib o‘tamiz, O‘zbekiston - Tojikiston hamkorligidagi harbiy mashg‘ulotlar 22-sentabr kuniga qadar davom etadi.