TOShKENT, 13-iyul — Sputnik. 2018-2019 yillarda Buxoro viloyatining sanoat salohiyatini rivojlantirish dasturini tasdiqlash to‘g‘risidagi Hukumat qarori qabul qilindi. Bu haqda Adliya vazirligi "Huquqiy axborot" kanali xabar qildi.
Qarorga muvofiq 2018-2019 yillarda to‘qimachilik, charm-poyabzali, oziq-ovqat, farmatsevtika, mebel va qog‘oz, mashinasozlik, elektrotexnika, qurilish materiallari va boshqa sohalarda umumiy qiymati 3 322 567 mln so‘mlik loyihalar amalga oshirish orqali 11 683 ta ish o‘rni yaratiladi.
Xususan, Buxoro viloyatida zamonaviy motosikl, velosiped, skuter va nogironlar aravachasi ishlab chiqarishni tashkil etish, bu orqali 100 ga yaqin shaxcni ish bilan ta’minlash rejalashtirilmoqda.
Eslatib o‘tamiz, ilgariroq O‘zbekiston Xitoy va Hindiston davlatlarining yetakchi kompaniyalari bilan hamkorlikda motosikl ishlab chiqaruvchi ikkita zavod ishga tushirishni rejalashtirganligi haqida xabar berilgandi. Shuningdek, "O‘zavtosanoat” va Janubiy Koreaning DK Group kompaniyasini bilan motosikl va uch g‘ildirakli motoroller ishlab chiqarish bo‘yicha bitim imzolangandi.