TOShKENT, 12-iyun — Sputnik. Kim Chen In va Donald Tramp seshanba kuni ertalab KXDR va AQSh o‘rtasida Singapurda o‘tkazilgan birinchi sammitda uchrashdilar.
Kim Chen In va Tramp uchrashuv boshlanishida bir-biriga tabassum qilishgan va bir-birining qo‘llarini siqishgan.
"Bu men uchun sharaf. Munosabatlarimiz a’lo bo‘ladi, mening bunga shubham yo‘q", — degan Tramp.
Tramp bu so‘zlarni aytganda, gap o‘zaro munosabatlar haqida bormoqdami, yoki davlatlararo aniqlik kiritmagan.
Kim Chen In o‘z navbatida Pxenyan va Vashington munosabatlardagi muammolarni yengib o‘tayotganini ta’kidlagan.
"O‘tmishimiz oyoqlarimizga kishan solsa-da, eshitish va ko‘rishga xalal bergan bo‘lsa-da, biz barchasini yengib bugun shu yerga yetib keldik", — deb ta’kidlagan shimoliy koreyalik rahbar.
Birga-bir formatidagi suhbat protokolda rejalashtirilgani kabi 45 daqiqaga yaqin davom etgan. AQSh prezidenti muzokaralar "juda va juda yaxshi" o‘tganligini ta’kidlab, "katta muammo va ziddiyatlarni" hal etishga ishonch bildirgan.
Shimoliy koreyalik rahbar esa jurnalistlar tomonidan uch bora "Yadroviy quroldan voz kechasizmi?", — deb berilgan savolga javob bermagan.
Birga-bir uchrashuvidan so‘ng yetakchilar kengaytirilgan tarkibdagi sammitni boshladilar. AQSh tomonidan tadbirda Davlat kotibi Mayk Pompeo, prezidentning milliy xavfsizlik bo‘yicha maslahatchisi Jon Bolton, Oq Uy devoni rahbari Jon Kelli ishtirok etmoqda. Shimoliy Koreya delegatsiyasi tarkibi esa — Koreya Mehnat partiyasi raisi o‘rinbosari Kim Yon Chxol, TIV rahbari Li Yon Xo va Koreya mehnat partiyasi raisi va xalqaro bo‘lim boshlig‘i Li Su Yonlardan iborat.
Sammitda yadroviy quroldan to‘liq voz kechish va Koreya yarim orolida tinchlikni kafolatlash, Amerika-Shimoliy Koreya munosabatlarini normallashtirish masalalari ko‘rib chiqiladi.
Hujjatlar imzolanishi kutilmayapti. Trampning so‘zlariga ko‘ra, ushbu uchrashuvdan maqsad "jarayonni boshlash".