TOShKENT, 13-may – Sputnik. Rossiyada Jahon Chempionati oldidan bolalar uylari tarbiyalanuvchilari orasida o‘tkazilayotgan “Kelajak sening qo‘lingda” jahon chempionatida O‘zbekiston terma jamoasi Nepal ustidan g‘alaba qozonib yarim finalga chiqdi, Sputnik muxbiri xabariga asosan.
Bugun Moskvadagi Lokomotiv stadionining "Sapsan-Arena" maydonida O‘zbekiston va Nepal orasida futbol o‘yini bo‘lib o‘tdi.
O‘yinda o‘zbekistonlik Ruslan Kotov ismli yosh futbolchi haqiqiy qahramonlik ko‘rsatdi, desak adashmaymiz. Raqib o‘yinchisi bilan to‘p uchun bo‘lgan shiddatli olishuvda Ruslanning oyog‘i jarohat oldi. Unga hatto shifokor yordami kerak bo‘ldi.
O‘yin qoidasini buzgan raqib darvozasiga esa – penalti belgilandi. Undan yana bir o‘zbekistonlik yosh futbolchi Ruslan Karaxanyan unumli foydalana oldi. Natijada O‘zbekiston 2:1 hisobda oldinga chiqib oldi.
O‘zbekiston jamoasi ustozi Jamshid Asadov Ruslan Kotovga ko‘rsatgan o‘yini uchun sidqidildan minnatdorlik bildirib, uni mahkam quchoqlab osmonga ko‘tardi. Ushbu o‘yinni tomosha qilishga O‘zbekiston elchixonasi vakillari ham tashrif buyurishgan edi.
Eslatib o‘tamiz, oldingi o‘yinlarda O‘zbekiston jamoasi Rossiya ustidan g‘alaba qozonib, Pokiston bilan durang hisob ko‘rsatgan edi. Oldinda Burundi Respublikasi jamoasi.