TOShKENT, 27 mar – Sputnik. Toshkentda Ukraina fuqarosi bilan 2 million dollarlik shartnoma tuzib, pulni berish o‘rniga uni o‘zlashtirib yuborgan shaxs qo‘lga olindi. Bu haqda O‘zbekiston IIV Jamoatchilik va ommaviy axborot vositalari bilan aloqalar boshqarmasi xabar berdi.
Xabarda aytilishicha, 23-mart kuni Toshkent shahar IIBBga tushgan hujjatlarga ko‘ra, 2017-yil 28-avgust kuni Chilonzor tumani 9-dahada yashovchi B.Axatov "Elegant Trade Business" MChJ tashkil etgan. U ushbu MChJga qarindoshi J.Rahmonovni rahbar etib tayinlab, 2017-yil 30-avgust kuni Ukraina fuqarosi Ya.Pishak bilan 2 million dollari miqdorida bo‘lgan farmatsevtika mahsulotlarini sotib olish bo‘yicha shartnoma tuzgan.
So‘ngra pullarni 90 kun ichida to‘liq to‘lab berishni va’da qilib, 1 mln 750 ming 146 dollarlik miqdordagi dori-darmon va farmatsevtika mahsulotlarini olib, pulni kelishilgan muddatda bermasdan 2017-yil 18-dekabr kuni o‘z majburiyatlarini "Regas meva biznes" MChJ rahbari X.Yadgarovga o‘tkazib bergan.
Sotib olingan farmatsevtika mahsulotlarini esa sotib, savdodan tushgan 1 mln 750 ming dollarni "Rnarm Produkt" MChJning qurilishiga investitsiya tariqasida kiritib pullarni shaxsiy ehtiyojlari uchun ishlatib yuborgan.
Xabar qilinishicha, J.Rahmonov ushlangan va B.Axatovni ushlash choralari ko‘rilgan.