TOShKENT, 26 mar — Sputnik. Afg‘oniston Islom Respublikasi prezidenti Ashraf G‘ani dushanba kuni O‘zbekistonga tashrif buyuradi, deb xabar qildi O‘zbekiston prezidenti matbuot-xizmati.
Ikki davlat rahbarlari 27-mart kuni "Tinchlik jarayoni, xavfsizlik sohasida hamkorlik va mintaqaviy sheriklik" mavzuyida Afg‘oniston bo‘yicha yuqori darajadagi xalqaro konferensiyada ishtirok etadi va so‘zga chiqadi.
Tashrif dasturida O‘zbekiston Prezidenti Shavkat Mirziyoyev va Afg‘oniston Prezidenti Muhammad Ashraf G‘ani muzokara o‘tkazishi ham ko‘zda tutilgan.
Eslatib o‘tamiz, Afg‘oniston bo‘yicha Toshkent anjumani 26-27 mart kunlari bo‘lib o‘tadi.
O‘zbekiston TIV xabariga ko‘ra, 12-mart sanasiga qadar o‘zlarining diplomatik kanallari orqali forumda ishtirok etishlarini Afg‘oniston, Hindiston, Eron, Qozog‘iston, Qirg‘iziston, Pokiston, Rossiya, Tojikiston, Turkiya TIV rahbarlari, Yevropa Ittifoqining xorijiy masalalar va xavfsizlik siyosati bo‘yicha Oliy vakili, Afg‘onistondagi BMT maxsus vakili tasdiqlaganlar.