TOShKENT, 26 yanv — Sputnik. Joriy yilning 18-yanvar kuni Aqto‘bedagi trassada yonib ketgan avtobus haydovchilari hibsga olindi. Hodisa oqibatida 52 nafar O‘zbekiston fuqarolari halok bo‘lishgan edi.
"Haydovchilar transport vositasini ekspluatatsiya qilish va yong‘in xavfsizligi qoidalarini buzishgan", — deb xabar berdi Aqto‘be viloyati prokuraturasi matbuot-xizmati.
Avtobusning uch nafar haydovchisi vaqtinchalik saqlash izolyatoriga joylashtirilgan. Ular 24-yanvar kuni tungi soat 22:40da qo‘lga olingan.
Haydovchilar yo‘l harakati qoidalari yoki transport vositalari ekspluatatsiyasi qoidalariga rioya etmaslik va ehtiyotsizlik oqibatida 2 va undan ortiq odamlar o‘limiga sabab bo‘lishda gumon qilinmoqda.
Ushbu modda bo‘yicha erkaklarga 5-10 yilgacha qamoq jazosi berilishi yoki ular yetti yilgacha muddatga ma’lum lavozimlarni egallash huquqidan dan mahrum etilishi mumkin.
Hozirda qo‘zg‘atilgan jinoiy ish bo‘yicha tergov respublika bosh prokuraturasi hamda Ichki ishlar vazirligi nazoratiga olingan.