TOShKENT, 26 mar — Sputnik. Tez fursatlarda O‘zbekistonda koronavirus bilan kasallanganlarni davolash va karantin uchun 10 taga yaqin shifoxonalar qurib bitkaziladi.
Sog‘liqni saqlash vazirligi matbuot xizmati xabariga ko‘ra,Toshkent shahrida 3 ta zamonaviy ixtisoslashgan tibbiyot muassasalari bunyod etilmoqda. Birinchisi, bu 144 o‘ringa mo‘ljallangan Chilonzor tumanida yangi qurilayotgan shahar 3-sonli bolalar yuqumli kasalliklari shifoxonasi va 158 o‘rinli shahar 4-sonli bolalar kardiorevmatologiya klinik shifoxona binolari yaqin oylarda foydalanishga topshirilishi rejalashtirilgan.
Shuningdek, Yashnobod tumanidagi Toshkent stomatologiya institutining yangi qurilayotgan binosini 250 o‘rinli zamonaviy davolash muassasasiga aylantirish ishlari ham amalga oshirilmoqda. Bino may oyida foydalanishga topshiriladi.
Bundan tashqari, Toshkent viloyati Yuqori Chirchiq tumanida karantin muassasasini juda qisqa kunlarda qurib bitkazilish choralari ko‘rilmoqda.
Yana bir yirik muassasa Zangiota tumanida bunyod etilmoqda. Ushbu tumandan ajratilgan 27 gektar yer maydonida o‘n ming o‘rinli shifoxona qurilishi jadal davom etmoqda va yaqin fursatlarda foydalanishga topshiriladi.
Shuningdek, ayni paytda Andijon, Navoiy va Surxondaryo viloyatlarida ham koronavirus bilan kasallanganlar va ularning karantini uchun xuddi shunday muassasalar qurilmoqda.
Eslatib o‘tamiz, avvalroq O‘zbekistonda maxsus karantin obyektlari qurilishi xabar qilingan edi.