TOShKENT, 27 fev - Sputnik. Saudiya Arabistoni o‘z hududida koronavirus tarqalishini oldini olish maqsadida bir qator choralar qabul qildi, deb xabar qilmoqda qirollik tashqi ishlar vazirligi.
Xususan, Saudiya Arabistoniga umra ziyorati hamda Madina shahrarlariga ziyorat maqsadida kelayotgan ayrim davlatlar fuqarolarga mamlakatga kirishini ta’qiqlash haqida bayonot chiqardi. Ushbu ta’qiq qirollikka turistik viza bilan kelayotgan sayyohlarga ham taaluqli bo‘ladi.
Bayonotda aynan qaysi davlat fuqarolari kiritilmasligi aniq ko‘rsatilmagan, “koronavirus xavfli ravishda tarqalayotgan davlatlar” deyilgan xolos.
Eslatib o‘tamiz, bugungi kunda dunyoda koronavirusga chalinganlar soni 80 mingdan oshib ketdi. Tuzalib ketganlar soni 25 ming kishini, vafot etganlar soni 2770 kishini tashkil qildi. Epidemiya 29 mamlakatga tarqalgan. Kasallikka chalinganlarning aksariyati Xitoyda, Keyin Janubiy Koreya, Eron va Italiyada qayd etilgan.
