TOShKENT, 24 apr – Sputnik. Jizzax viloyatida joylashgan “Forish” tog‘ dala poligonida “Hamdo‘stlik qalqoni-2019” hamkorlikdagi maxsus-taktik o‘quv mashg‘ulotlarining tayyorgarlik mashqlari bo‘lib o‘tmoqda.
“O‘zbekiston, Turkiya va Pokiston maxsus operatsiya kuchlari bilan hamkorlikda o‘tkazilayotgan mashg‘ulotlar rejasiga muvofiq, bugun, 23-aprel kuni poligon hududida o‘zaro tarjiba almashish jarayonlari boshlandi. Uchchala davlat harbiy xizmatchilari mashg‘ulotlarning asosiy qismi bo‘lib o‘tadigan hududni o‘rganib chiqishdi”, - deb xabar qilmoqda Mudofaa vazirligi matbuot xizmati.
Forish” poligonida “Hamdo‘stlik qalqoni—2019” hamkorlikdagi maxsus-taktik o‘quv mashg‘ulotlari 27-aprelga qadar davom etadi.
“Hamdo‘stlik qalqoni-2019” o‘tkazilayotgan hamkorlikdagi o‘quv mashqlarida harbiy xizmatchilar jahonda va mintaqada keskin o‘zgarib borayotgan harbiy-siyosiy vaziyat, milliy va global xavfsizlik sohasida ro‘y berishi mumkin bo‘lgan xatar hamda tahdidlarga qarshi kurashishning eng ma’qul usul va uslublarini qo‘llash borasida o‘zaro tajriba almashadilar.
Eslatib o‘tamiz, 2017-yilning oktabr oyida “Forish” poligonida Rossiya va O‘zbekiston mudofaa idoralari tog‘-o‘qchi bo‘linmalarining hamda 2018-yilning iyul oyida o‘zbekistonlik harbiy xizmatchilar bilan qozog‘istonlik hamkasblari o‘rtasida hamkorlikdagi mashg‘ulotlari o‘tkazilgan edi.