TOShKENT, 30 noya — Sputnik. O‘zbekiston prezidenti Shavkat Mirziyoyev 2019-yilda ilk bor Belarus Respublikasiga tashrif buyurishi mumkin, deb xabar bermoqda RIA Novosti.
Shavkat Mirziyoyevning O‘zbekiston davlat rahbari sifatida Belarus respublikasiga birinchi tashrifi bo‘ladi. Avvalroq Belarus prezidenti Aleksandr Lukashenko o‘zbekistonlik hamkasbini “do‘sti va birodari” sifatida hamisha qabul qilishga tayyor ekanligini ma’lum qilgan edi.
O‘zbekistonning Belarusdagi elchisi Nosirjon Yusupovning aytishicha, har ikki taraf tashrifga puxta tayyorgarlik ko‘rmoqda.
Eslatib o‘tamiz, Belarus prezidenti joriy yilning 12-14 sentabr kunlari rasmiy tashrif bilan O‘zbekistonga kelgan edi. Ko‘ksaroyda Shavkat Mirziyoyev va Aleksandr Lukashenko ikki davlat rahbarlarining Qo‘shma bayonoti va 19 ta hujjatni imzolashgan edi. Shuningdek, ikki davlat Bosh vazirlari hamkorlikni rivojlantirish bo‘yicha “yo‘l xaritasini” tasdiqlashgan edi.