TOShKENT, 6 mar — Sputnik. O‘zbekistonning birinchi prezidenti Islom Karimovning kenja qizi Lola Karimova-Tillyayeva gimnastika federatsiyasi prezidenti lavozimini tark etmoqda.
"Mana 13-yillik faoliyatimdan so‘ng, O‘zbekiston gimnastika federatsiyasi Prezidentligi lavozimini tark etishga majbur ekanligimni e’lon qilmoqchiman. Men barcha sportchilarimiz, federatsiyaning butun murabbiylar jamoasi hamda barcha ishchi xodimlariga a’lo bajarilgan faoliyatlari, ushbu sport turini yuqori darajaga ko‘tarishdagi hissalari, uning rivojlanish yo‘lida tinimsiz mehnatlari hamda g‘ayratlari uchun chin dilimdan tashakkur bildirmoqchiman", — degan Lola Karimova o‘z postida.
Karimovaning so‘zlariga ko‘ra, u Osiyo Gimnastika Ittifoqining fahriy prezidenti lavozimini saqlab qoladi va ushbu sport turining ashaddiy muhlislaridan bo‘lib qolaveradi.
Eslatib o‘tamiz, fevral oyi boshida Lola Karimova O‘zbekistonning YuNESKOdagi elchisi vazifasini tark etayotgani haqida ma’lum qilgan edi.