TOShKENT, 17 avg — Sputnik. "Salomatlik" poyezdi vodiy aholisini tibbiy ko‘rikdan o‘tkazmoqda, deb xabar qildi Sog‘liqni Saqlash vazirligi matbuot-xizmati.
14 avgustdan Andijon, Namangan va Farg‘ona viloyatlarining chekka hududlarida istiqomat qiluvchi aholini malakali mutaxassislar ishtirokida chuqurlashtirilgan tibbiy ko‘riklardan o‘tkazish maqsadida tashkil etilmoqda.
Shu vaqtgacha "Salomatlik" poyezdlari O‘zbekistonning Qoraqalpog‘iston Respublikasi, Xorazm, Buxoro, Navoiy, Samarqand, Qashqadaryo va Surxondaryo viloyatlarining eng olis hududlari aholisini chuqurlashtirilgan tibbiy ko‘riklardan o‘tkazgan edi. Vazirlik axborotiga ko‘ra, haftalik davomida 17 ming nafarga yaqin fuqaro, jumladan, 12389 nafar katta yoshdagi va 4 ming nafardan ziyod yosh bolalar chuqurlashtirilgan tibbiy ko‘rikdan o‘tkazilgan.
Tibbiy ko‘riklar natijasida 13 ming nafarga yaqin fuqarolar ambulator sharoitida sog‘lomlashtirilib, 2 mingdan ziyodi viloyat va tuman shifoxonalarida va to‘rt yuz nafarga yaqini esa respublika tasarrufidagi davolash-profilaktika muassasalarida davolanishlari uchun amaliy yordam ko‘rsatilgan.
"Salomatlik" poyezdlari faoliyatining asosiy maqsadi ixtisoslashtirilgan tibbiy yordamni viloyat aholisiga yanada yaqinlashtirish, eng chekka tumanlarda yashovchi fuqarolar ham yuqori texnologik tibbiy yordamdan bahramand bo‘lishi uchun shart-sharoitlar yaratish, mahalliy shifokorlar uchun mahorat darslari o‘tkazishdir.