TOShKENT, 19 sen — Sputnik. O‘zbekiston musulmonlari idorasi raisi, muftiy Usmonxon Alimov 2014-yilning 27-avgust kuni Toshkent shahridagi "Yakkasaroy" jome masjidiga birinchi g‘ishtini qo‘yib bergan edi. Shu yilning 16-sentabr kuni esa ushbu masjidning yangi binosining ochilishiga tashrif buyurdilar, deb xabar qiladi muslim.uz.
Usmonxon Alimov bu xayrli ishda ko‘makchi bo‘lgan barcha insonlarga o‘z minnatdorchilik bildirdilar va shundan so‘ng juma namozini o‘qib berdilar.
Toshkent shahridagi "Yakkasaroy" jome masjidi qariyb 100-yillik tarixga ega. 23 metrga bo‘y cho‘zgan gumbazli xonaqoh devorlari, mehrob o‘ziga xos naqshlar bilan bezatilgan. Bino gumbazining tashqari tomondan balandligi yuqorisidagi oy ramzi bo‘yi bilan 28 metrga, minoraning balandligi esa 31.5 metrni tashkil etadi. Mohir xattotlar tomonidan mehrob usti va devoriga Qur’oni karim oyatlaridan hamda hadisi shariflarda vorid bo‘lgan duolar muhrlangan.
Qayta ta’mirlangan masjid bir vaqtning o‘zida mingga yaqin dindorlarni o‘z ichiga sig‘dira oladi.
Juma namozi oxirida to‘planganlar masjid qurilishida ishtirok etgan barcha hasharchilarga va shu kabi xayrli ishlarda doimo bosh-qosh bo‘lgan O‘zbekistonning birinchi Prezidenti marhum Islom Karimov haqiga xayrli duolar qildilar.
