TOShKENT, 30 apr — Sputnik. O‘zbekistonda ko‘p kvartirali uylarni saqlash va ulardan foydalanish bo‘yicha yangi qoidalar belgilandi.
Qoidalarga ko‘ra, ko‘p kvartirali uylarga tutash yer uchastkalarida maktabgacha va maktab yoshidagi bolalar o‘ynashi uchun maydonchalar bo‘lishi kerak.
Shuningdek, bunday hududlarda katta yoshdagi aholining dam olishi, jismoniy tarbiya mashg‘ulotlari bilan shug‘ullanishi, maishiy chiqindilarni yig‘ish, it va boshqa uy hayvonlarini sayr qildirish uchun umumiy foydalanish maydonchalari tashkil etilishi lozim.
Qoidalarda velosiped va boshqa mobil vositalarni saqlash uchun ham joylar bo‘lishi belgilangan. Bunday vositalar qatoriga samokatlar, nogironligi bo‘lgan shaxslar va bolalar aravachalari ham kiradi.
Boshqarish organi aholiga qulaylik yaratish maqsadida ko‘p kvartirali uyga tutash yer uchastkasida o‘rindiqlar o‘rnatishi hamda tegishli masofada chiqindilarni ajratib tashlash uchun maxsus o‘rnalar joylashtirishi kerak.
Bundan tashqari, uylarga tutash yer uchastkalari va infratuzilma obyektlari obodonlashtirilishi, daraxtlar, o‘simliklar, o‘tish yo‘laklari va trotuarlarga suv sepish uchun muhandislik-texnik qurilmalar bilan jihozlanishi lozim.
Hududlar elektr yoritish tizimiga ham ega bo‘lishi kerak.