TOShKENT, 20 apr — Sputnik. Rossiya bosh vazirining birinchi o‘rinbosari Denis Manturov O‘zbekistonda yangi qo‘shma sanoat parkida birinchi rezident ishlab chiqarishiga start berilishini ma’lum qildi, deb xabar bermoqda Sputnik O‘zbekiston muxbiri.
Uning so‘zlariga ko‘ra, bunday maydonlar allaqachon Chirchiq va Jizzaxda faoliyat yuritmoqda. Endi esa Navoiy viloyatidagi yangi qo‘shma sanoat parkida ham ishlab chiqarish yo‘lga qo‘yilmoqda.
“Bugun Jamshid Abduhakimovich bilan birgalikda Navoiy viloyatidagi yangi qo‘shma sanoat parkida birinchi rezident ishlab chiqarishiga start beramiz”, — dedi Manturov “Innoprom. Markaziy Osiyo — 2026” doirasida.
Uning ta’kidlashicha, texnologik kompetensiyalarni rivojlantirishga qaratilgan bunday sanoat markazlari boshqa xalqaro hamkorlarda ham qiziqish uyg‘otmoqda.
Manturov, shuningdek, Rossiya Markaziy Osiyo davlatlari bilan sanoat va sarmoyaviy hamkorlikni izchil rivojlantirayotganini aytdi. Uning so‘zlariga ko‘ra, Qozog‘istonda qariyb 3,9 trillion rubllik 170 dan ortiq qo‘shma loyiha amalga oshirilmoqda, Qirg‘izistonda Rossiya asosiy investorlar uchligiga kiradi, Tojikiston va Turkmanistonda esa Rossiya biznesi sanoat va energetika sohalarida ishtirok etmoqda.
“Mintaqaning barcha mamlakatlari bilan gidroenergetika, suv ta’minoti, Rossiya dizaynidagi atom elektr stansiyalarini qurishga alohida e’tibor qaratmoqdamiz”, — dedi u.
“Innoprom” doirasida Rossiya va Markaziy Osiyo mamlakatlari sanoat vazirlarining birinchi yig‘ilishi ham bo‘lib o‘tdi. Manturov unda umumiy maqsad biznesning texnologik yetukligini oshirish va yangi istiqbolli sohalarni o‘zlashtirishdan iborat bo‘lishi kerakligini ta’kidladi.
“Biz o‘z yutuqlarimizni, jumladan, hamkorlarimiz hududida ishlab chiqarishni mahalliylashtirish imkoniyatlarini ham baham ko‘rishga tayyormiz. Umuman olganda, qo‘shma ilmiy, ta’lim va investitsiya dasturlari doirasida hamkorlik qilishga tayyormiz”, — dedi Manturov.
Uning qo‘shimcha qilishicha, hamkorlikning asosiy tamoyili malaka almashish, transport infratuzilmasi, logistika va elektron tijoratni rivojlantirish, shuningdek, moliyaviy va gumanitar aloqalarni mustahkamlashdan iborat bo‘lishi kerak.