Pezeshkiyon: 14 mln eronlik vatan himoyasi uchun jonini fido qilishga tayyorligini bildirdi

TOShKENT, 7 apr — Sputnik. Eron prezidenti Mas’ud Pezeshkiyon 14 million nafardan ortiq eronlik mamlakatni himoya qilishga tayyorligini ma’lum qildi.

"14 milliondan ortiq jasur eronliklar shu paytgacha Eronni himoya qilish uchun jonini fido qilishga tayyorligini bildirgan. Men ham o‘zimni qurbon qildim, qurbon qilyapman va qurbon qilaman", - deb yozdi Pezeshkiyon o‘zining X ijtimoiy tarmog‘idagi sahifasida.

Bu bayonot Vashington bosimni kuchaytirib, Eronga yangi muddat qo‘ygan paytda yangradi. Xalqaro OAV ma’lumotlariga ko‘ra, Eronda ham fuqarolarni mamlakat infratuzilmasini himoya qilishga jalb etish chaqiriqlari kuchaygan.

Shu orada, AQSh tomoni ham mojaro bo‘yicha yangi ma’lumotlarni ochiqladi. CBS telekanali AQSh Qurolli kuchlari Markaziy qo‘mondonligi vakiliga tayanib, Eronga qarshi operatsiya davomida 373 nafar amerikalik harbiy yaralanganini xabar qildi. Kanal ma’lumotiga ko‘ra, ularning aksar qismi safga qaytgan, bir qismi esa og‘ir jarohat olgan.

Eron Islom inqilobi qo‘riqchilari korpusi (IIQK) avvalroq mojaroda AQSh va Isroilning 680 nafardan ortiq harbiysi halok bo‘lgani va yaralanganini ma’lum qilgan edi.

Shu bilan birga, Vashington Tehronga bosimni yana kuchaytirdi. "Reuters" va AP ma’lumotlariga ko‘ra, AQSh prezidenti Donald Tramp Eron Vashington bilan kelishuvga erishmasa, mamlakat infratuzilmasiga, jumladan, ko‘priklar va elektr stansiyalariga zarba berilishi mumkinligini aytgan. Aytilgan dedlayn AQSh sharqiy vaqti bilan 7-aprel soat 20:00, ya’ni Toshkent vaqti bilan 8-aprel soat 05:00 ga to‘g‘ri keladi.

Shu o‘rinda, "Politico" gazetasi idoraning nomi oshkor etilmagan ikki vakiliga tayanib, AQSh Eron infratuzilmasiga zarbalar berishda harbiy jinoyatlar bo‘yicha ayblovlardan qochishga harakat qilayotgani, shu bois Pentagon nishonlar ro‘yxatini qayta ko‘rib chiqayotganini yozdi.

"Pentagon hujum qilishi mumkin bo‘lgan Eron energetika obektlari ro‘yxatini kengaytirmoqda, unga tinch aholini ham, harbiylarni ham ta’minlaydigan obektlar ro‘yxati kiritilgan. Agar ma’muriyat infratuzilmaga zarba bergani uchun harbiy jinoyatlarda ayblansa, bu ehtimoliy aylanma yo‘ldir", - deb yozadi nashr.

Nashrning qayd etishicha, Pentagonda harbiy va fuqarolik maqsadlari o‘rtasidagi chegara qayerdan o‘tishi masalasi qizg‘in muhokama qilinmoqda.

Masalan, Vashingtonda suv tozalash inshootlarini nishon deb hisoblash mumkin, deb hisoblashadi, chunki harbiylarga ham ichish uchun suv kerak.

Bu masala xalqaro huquq nuqtayi nazaridan ham bahs-munozaralarga sabab bo‘lmoqda. BMT va xalqaro huquq bo‘yicha ekspertlar ko‘priklar, elektr stansiyalari va fuqarolik hayotiga bog‘liq boshqa obektlarga zarba berish xalqaro gumanitar huquqni buzishi mumkinligini ta’kidlagan. Avvalroq BMT bosh kotibi vakili Stefan Dujarrik ham bunday ehtimoliy zarbalar xalqaro huquqqa zid bo‘lishini aytgan edi

28 fevral kuni AQSh va Isroil Eronga zarba berishni boshladi. Zarbalar Eronning yadroviy dasturi borasida muzokaralar olib borilayotgan vaqtda amalga oshirildi.

AQSh va Isroil zarbalari oqibatida Eron Oliy rahbari oyatulloh Ali Xomanaiy halok bo‘ldi. Undan tashqari, Minob shahrida qizlar boshlang‘ich maktabiga berilgan zarba oqibatida 171 nafar bola va 15 nafar o‘qituvchilar halok bo‘ldi.

Eron Isroil hududiga, shuningdek, Yaqin Sharqdagi AQSh harbiy bazalariga javob zarbalari berdi. Bir necha kun davomida BAA, Bahrayn, Ummon, Iroq, Saudiya Arabistoni, Qatar va boshqa qator davlatlardagi AQSh harbiy bazalari zarbaga uchradi.

Eron Ho‘rmuz bo‘g‘ozini yopib qo‘ydi va kemalar faqat Eron bilan kelishilgan tartibda undan o‘tishi mumkinligini e’lon qildi. Buning ortidan jahon bozorlarida neft narxi oshishni boshladi.

Rossiya prezidenti Vladimir Putin Eron oliy rahbariga suiqasd barcha insoniy axloq normalari va xalqaro huquqni buzish ekanini ta’kidladi. Rossiya va Xitoy 1-mart kuni BMT Xavfsizlik Kengashining favqulodda majlisini chaqirdi.

Amerikalik harbiylar akulalarga ajoyib yem bo‘ladi: Eron Tramp tahdidiga javob qaytardi

29 Mart, 18:56