TOShKENT, 7 apr — Sputnik. Yevroosiyo iqtisodiy ittifoqi (YeOII) va Pokiston erkin savdo to‘g‘risidagi bitimni tuzish maqsadga muvofiqligini o‘rganish bo‘yicha qo‘shma tadqiqot guruhini shakllantirish jarayonini boshlashga kelishib oldi.
Bu haqda Yevroosiyo iqtisodiy komissiyasi savdo bo‘yicha vaziri Andrey Slepnyov va Pokiston federal savdo vaziri Jam Kamol Xon o‘rtasidagi uchrashuv yakunlari bo‘yicha ma’lum qilindi.
Slepnyovning ta’kidlashicha, Yevroosiyo iqtisodiy ittifoqi va unga a’zo davlatlar Janubiy Osiyo mamlakatlari bilan o‘zaro manfaatli aloqalarni rivojlantirishga katta e’tibor qaratmoqda.
U Pokistonni mintaqadagi istiqbolli hamkorlardan biri sifatida baholab, tomonlar o‘rtasidagi savdo jadal rivojlanayotgani va uni kengaytirish uchun katta salohiyat mavjudligini qayd etdi.
Pokiston federal savdo vaziri Jam Kamol Xon esa YeOII bilan hamkorlikni chuqurlashtirish mamlakat uchun nafaqat savdo sohasida yangi imkoniyatlar, balki logistika, energetika, raqamli savdo, sanoat va ta’minot zanjirlari integratsiyasi kabi yo‘nalishlarda ham strategik sheriklikni anglatishini bildirdi.