TOShKENT, 1 apr — Sputnik. Toshkentda “E-commerce Central Asia Expo 2026” xalqaro ko‘rgazma-konferensiyasi bo‘lib o‘tmoqda. Bu haqda Sputnik O‘zbekiston muxbiri xabar bermoqda.
Forum doirasida sohaning asosiy yo‘nalishlari — marketpleyslar, fintex va banklar, logistika va fulfilment, AT yechimlar va avtomatlashtirish hamda marketing hamda tahlil masalalari muhokama qilinmoqda.
Qayd etilishicha, O‘zbekistonda elektron tijorat hajmi so‘nggi besh yil ichida qariyb 22 barobarga o‘sgan va 2025-yil yakunlariga ko‘ra qariyb 2 milliard dollarga yetgan.
Elektron tijoratni rivojlantirish va tartibga solish boshqarmasi boshlig‘i Kamronbek Muhammadiyevning ta’kidlashicha, sohaning yillik o‘sish sur’ati o‘rtacha 30-50 foizni tashkil etmoqda. Shu bilan birga, chakana savdodagi elektron tijorat ulushi hozircha 5 foiz atrofida bo‘lib, bu jahon ko‘rsatkichlaridan — 15-20 foizdan pastligicha qolmoqda.
Uning so‘zlariga ko‘ra, elektron tijorat sohasi o‘zini o‘zi band qilganlar va yakka tartibdagi tadbirkorlarni ham qo‘shib hisoblaganda, milliondan ortiq aholining bandligini ta’minlamoqda va mamlakat iqtisodiyotining muhim drayverlaridan biri sifatida baholanmoqda.