TOShKENT, 27 mar – Sputnik. Qozog‘istonning Chimkent shahrida Yevroosiyo hukumatlararo kengashi yig‘ilishi kengaytirilgan tarkibda bo‘lib o‘tdi. Unda tashkilot huzurida kuzatuvchi davlat sifatida O‘zbekiston bosh vaziri Abdulla Aripov ishtirok etdi va YeOII va mamlakat hamkorligining qator yo‘nalishlariga to‘xtaldi.
Zasedanie Yevraziyskogo mejpravitelstvennogo soveta
© Sputnik / Grigoriy Sisoyev
/ "O‘zbekiston Yevroosiyo iqtisodiy ittifoqi mamlakatlari, strategik va tabiiy hamkorlarimiz bilan o‘zaro manfaatli hamkorlikni chuqurlashtirishni niyat qilgan. So‘nggi yillarda o‘zaro savdo hajmi sezilarli darajada oshdi, sanoat, qishloq xo‘jaligi, transport va raqamli iqtisodiyotda kooperatsiya kengaymoqda. Xususan, o‘tgan yil yakunlariga ko‘ra O‘zbekistonning birlashma davlatlari bilan tashqi savdo aylanmasi 25 foizga o‘sib, 20 mlrd dollardan oshdi. YeOII davlatlarining mamlakatimizning umumiy savdo aylanmasidagi ulushi qariyb 25 foizga yetdi, O‘zbekiston eksportining qariyb 30 foizi ittifoq davlatlari bozorlariga yo‘naltirilmoqda”, - dedi Aripov o‘z nutqi avvalida.
Bosh vazirning so‘zlariga ko‘ra, uch yillik tadbirlar rejasini amalga oshirish doirasida Yevroosiyo iqtisodiy komissiyasi (YeIK) bilan qo‘shma ishchi guruh formatida hamkorlik yo‘lga qo‘yildi.
Aripov uning navbatdagi beshinchi majlisini Toshkentda o‘tkazishni va bir qator qo‘shma hujjatlarni, jumladan, bojxona chegaralari orqali olib o‘tilayotgan tovarlar va transport vositalari to‘g‘risida ma’lumot almashish to‘g‘risidagi bitim hamda O‘zbekistonning tarmoq dasturlari, birlashmaning dasturiy loyihalarida kuzatuvchi maqomida to‘liq rasmiy amaliy ishtirokini muhokama qilishni taklif etdi.
Uning ta’kidlashicha, Yevroosiyo taraqqiyot bankining O‘zbekistonda ochish to‘g‘risidagi bitimning imzolanishi hamkorlikni mustahkamlashning yana bir muhim bosqichi bo‘ldi.
“Yaqin kelajakda infratuzilma, energetika, metallurgiya, kimyo va boshqa sohalarda ilgari kelishilgan loyihalarni moliyalashtirishni, shuningdek, kichik va o‘rta biznesni qo‘llab-quvvatlashni taklif etamiz”, - dedi Aripov.
Bosh vazir mamlakat prezidenti Shavkat Mirziyoyevning Oliy Yevroosiyo iqtisodiy kengashi majlislarida e’lon qilingan tashabbuslarini amalga oshirish maqsadida qo‘shma sa’y-harakatlarni quyidagi yo‘nalishlarga qaratish maqsadga muvofiq deb hisoblashini bildirdi:
Birinchidan, asosiy vazifa savdo to‘siqlarini bosqichma-bosqich bartaraf etish bo‘lib qolmoqda. Bunga texnik tartibga solish, sanitariya, fitosanitariya va veterinariya talablarini yaqinlashtirish hamda ortiqcha tartib-tamoyillarni bartaraf etish bo‘yicha amaliy hamkorlik yordam beradi. Biz oziq-ovqat mahsulotlarini, jumladan, hayvonot mahsulotlarini yetkazib beruvchilarning arizalarini ko‘rib chiqishni tezlashtirishni qo‘llab-quvvatlaymiz. Yuzaga kelayotgan masalalarni tezkor ko‘rib chiqish uchun tarif va tarifsiz to‘siqlar bo‘yicha O‘zbekiston – YeOII qo‘shma muvofiqlashtiruvchi guruhining faoliyatini boshlash zarur.
Ikkinchidan, barqaror ishlab chiqarish zanjirlarini shakllantirish, mahsulotlarni mahalliylashtirish, texnologiyalarni berish va tashqi bozorlarga birgalikda kirish maqsadida sanoat kooperatsiyasi va investitsiya sherikligini rivojlantirishga alohida ahamiyat beramiz. Shu munosabat bilan mashinasozlik, energetika, agrosanoat majmuasi, kimyo sanoati va boshqa sohalardagi ustuvor loyihalar ro‘yxatini birgalikda shakllantirish muhimdir.
“Ushbu masalalarni Toshkentda aprelda bo‘lib o‘tadigan “Innoprom. Markaziy Osiyo” xalqaro ko‘rgazmasida batafsil muhokama qilishni taklif etamiz. Biz barcha hamkorlarimizni sanoat kooperatsiyasini kengaytirish va qo‘shma loyihalarni ilgari surishga yordam beradigan bo‘lajak tadbirlarda faol ishtirok etishga taklif qilamiz”, - dedi Aripov.
Uchinchidan, raqamli texnologiyalar sohasidagi o‘zaro ta’sirni kuchaytirish muhim deb hisoblaymiz. Biz YeIK bilan birgalikda raqamli platformalarni, jumladan, elektron tijorat, raqamli markalash va tovarlarni kuzatish bo‘yicha yo‘l xaritasini tayyorlash bo‘yicha ishlarni faollashtirishni taklif etamiz. Biz bojxona ma’muriyatini raqamlashtirish, to‘liq ma’lumot almashishni boshlash va Yevroosiyo transport yo‘laklari doirasida yuk tashishning uzluksiz modeliga o‘tishni alohida ustuvor vazifa sifatida ko‘ramiz.
To‘rtinchidan, O‘zbekiston ittifoqning biotibbiyot, yangi materiallar, agrotexnologiyalar, energetika va robototexnika sohalaridagi texnologik platformalariga ulanishdan manfaatdor.
Beshinchidan, turizm sohasida o‘zaro hamkorlikni rivojlantirish istiqbolli deb hisoblaymiz. Biz ushbu sohada integratsiyalashgan axborot resursini shakllantirishga ulanishga tayyormiz, bu bizning mamlakatlarimizning sayyohlik mahsulotlarini birlashtirishga imkon beradi.
Tadbirda YeOIIga a’zo mamlakatlar vakillari – Armaniston bosh vaziri o‘rinbosari, Belarus, Qozog‘iston, Qirg‘iziston va Rossiya bosh vazirlari, kuzatuvchi davlatlardan Eronning Qozog‘istondagi elchisi, Kuba bosh vaziri o‘rinbosari ham ishtirok etdi. Shuningdek, yig‘ilishda taklif etilgan mamlakat – Tojikiston bosh vaziri ham ishtirok etdi.
YeOII
Yevroosiyo iqtisodiy ittifoqi (YeOII) - 2015-yil 1-yanvardan faoliyat yuritib kelayotgan xalqaro iqtisodiy birlashma. Ittifoqqa hozir Rossiya, Armaniston, Belarus, Qozog‘iston va Qirg‘iziston a’zodir. O‘zbekiston 2020-yilda YeOIIda kuzatuvchi maqomini oldi. Moldova, Kuba, Eron ham kuzatuvchi maqomiga ega.