TOShKENT, 16 mar — Sputnik. Ob-havo isishi munosabati bilan tabiiy gaz uchun isitish mavsumida amal qilgan oylik 500 kub metrlik bazaviy meyor 15-martda tugadi.
Energetika vazirligi xabariga ko‘ra, 16-martdan boshlab esa odatiy tartib qaytdi: aholi uchun har oyga 100 kub metrlik bazaviy meyor qo‘llanadi.
Ta’kidlanishicha, O‘zgidromet ma’lumotiga ko‘ra, 16–20 mart kunlari respublika hududlarida kunduzi havo harorati +22 darajagacha, kechasi esa +10 darajagacha ko‘tarilishi kutilmoqda.
Shu munosabat bilan 16-martdan 1-noyabrgacha, Xorazm viloyati va Qoraqalpog‘istonda esa 1-oktabrgacha har oy uchun 100 kub metrgacha bazaviy meyor amal qiladi.
Mart oyi uchun muhim izoh:
1–15 mart kunlari uchun 500 kub metrlik qishki bazaviy meyorning yarmi — 250 kub metr;
16–31 mart kunlari uchun 100 kub metrlik odatiy bazaviy meyorning yarmi — 50 kub metr.
Demak, mart oyining ikkinchi yarmidagi shu 50 kub metr gaz uchun ham aholi bazaviy tarifda to‘laydi — 1 kub metr uchun 1000 so‘m. Agar shu hajm bazaviy meyordan tashqari hisoblanganida, tarif 1800 so‘m bo‘lar edi. Shu tariqa, har bir xonadon 40 ming so‘mgacha tejab qolishi mumkin.