TOShKENT, 9 mar — Sputnik. Slovakiya bosh vaziri Robert Fitso Ukraina orqali neft tranzitini tiklash uchun Vengriyadan Kiyevga kreditni bloklash “estafetasi”ni qabul qilishga tayyorligini bildirdi.
Uning aytishicha, 10-mart kuni Parijda Yevrokomissiya rahbari Ursula fon der Lyayen bilan uchrashuvda Kiyevning “Drujba” quvuri orqali neft haydashni to‘xtatishi masalasi muhokama qilinadi.
Fitso fikricha, Yevrokomissiya Vladimir Zelenskiyni neft quvurining go‘yoki shikastlangan qismini tekshirishga ruxsat berishga majbur qilishi mumkin.
“Eng muhim xabar shuki, Slovakiya, agar kerak bo‘lsa, Vengriyadan estafetani qabul qilishga tayyor. Hozir Ukraina uchun 90 milliardlik harbiy kredit amalda bloklangan. Ukraina prezidenti bir yarim oydan so‘ng, ya’ni Vengriyadagi saylovlardan so‘ng, muxolifatning g‘alabasiga umid qilmoqda. Agar Vengriya estafetasini boshqa davlat qabul qilmasa, sharqdan neft olish imkoniyati qolmaydi”, — dedi Fitso yakshanba kuni e’lon qilgan videomurojaatida.
Uning ta’kidlashicha, Yevropa kreditini bloklash neft yetkazib berishni tiklash uchun qonuniy bosim vositasi hisoblanadi. Fitso Ukraina tomonining neft tranzitini to‘xtatish qarorini “ahmoqona qadam” deb atadi.
“Ukrainaga dizel yoqilg‘isi va favqulodda elektr energiyasi yetkazib berishni to‘xtatish haqidagi qarorimiz, shuningdek Vengriyaning Ukraina uchun harbiy kreditni bloklashi Zelenskiyning Slovakiya va Vengriyaga neft yetkazib berishni to‘xtatish haqidagi ahmoqona qaroriga mantiqiy javobdir”, — dedi u.
Shuningdek, Fitso quvur Ukraina tomonidan yo‘q qilinishi ehtimoli haqida ham gapirdi.
“Agar kechiktirsak, Zelenskiy neft quvurini yo‘q qilishga qodir ekaniga shubham yo‘q. Axir, “Shimoliy oqim” suv osti gaz quvurining yo‘q qilinishi ham uning ruxsatisiz sodir bo‘lganiga ishonish qiyin”, — dedi u.
Fitsoning so‘zlariga ko‘ra, Slovakiya va YeI rasmiylari Ukraina tomoni quvurning go‘yoki shikastlangan qismini ko‘zdan kechirish uchun sharoit yaratishini so‘ragan, ammo Kiyev bunga keskin rad javobini bergan.
Kiyev 27-yanvar kuni Rossiya neftini Ukraina hududi orqali “Drujba” quvuri bo‘ylab Slovakiya va Vengriyaga yetkazib berishni to‘xtatgan edi.
Slovakiya rasmiylari fikricha, quvur ishchi holatda qolmoqda, buni sputnik tasvirlari ham tasdiqlaydi. Ularning fikricha, tranzitning to‘xtatilishi texnik emas, balki Ukraina tomonining siyosiy qarori bo‘lgan.
“Drujba” — dunyodagi eng yirik magistral neft quvurlaridan biri bo‘lib, Rossiya neftini Markaziy va Sharqiy Yevropa mamlakatlariga yetkazib beradi. Quvurning janubiy tarmog‘i orqali Vengriya, Slovakiya va Chexiyaga neft uzatiladi.