O‘zbekiston Tasviriy san’at galereyasida "Parvozga intilgan qalb" ko‘rgazmasi ochildi

TOShKENT, 8 mar — Sputnik. O‘zbekiston Tasviriy san’at galereyasida 8-mart — Xalqaro xotin-qizlar kuniga bag‘ishlangan “Parvozga intilgan qalb” nomli ko‘rgazmaning ochilish marosimi bo‘lib o‘tdi.

Bunday ko‘rgazmalarni tashkil etish galereyaning ezgu an’anasiga aylangan bo‘lib, ular turli avlod va ijodiy yo‘nalish vakillarini bir maydonda jamlaydi.

Bahor nafasi bilan uyg‘unlashgan ushbu ko‘rgazmada ayol rassomlarning ijodiy qarashlari, rang va shakl orqali ifoda etilgan hissiyotlari hamda badiiy izlanishlari namoyon etildi.

Ko‘rgazmaning asosiy g‘oyasi — ayol ijodkorni fikrlovchi, his etuvchi va yaratuvchi shaxs sifatida ko‘rsatish, uning ijod olami mavzu va shakl jihatidan cheksiz ekanini ochib berishdan iborat.

“Ushbu ko‘rgazma ayol ijodkorlarning nafaqat badiiy mahoratini, balki ularning chuqur hissiyotlari va ijodiy dunyoqarashini ham namoyon etadi.”

Ekspozitsiyada rangtasvirchi rassomlar Florida Gambarova, Shaxnoz Abdullayeva, Dilorom Mamedova, Li Safi Mariya, Tatyana Fadeyeva, Viktoriya Troshina, Sarvinoz Qosimova, Anna Grigorans va Darya Sarbashning asarlari namoyish etildi.

Shuningdek, grafik rassom Tatyana Lining ishlari, haykaltarosh Lyudviga Nesterovichning haykaltaroshlik asarlari, chinniga naqsh solish ustasi Rimma Gazaliyeva, kulol Nazira Kuziyeva va zargar Annel Ulumbekovaning dekorativ-amaliy san’at namunalari ham tomoshabinlarga taqdim etildi.

Ko‘rgazma bahor kayfiyati, nafosat va ilhomga boy muhiti bilan tashrif buyuruvchilarda katta taassurot qoldirdi.