TOShKENT, 3 mar — Sputnik. Tabiiy gaz uchun isitish mavsumida belgilangan bazaviy meyor O‘zbekistonning barcha hududlarida 15-martga qadar uzaytirildi. Bu haqda Energetika vazirligi matbuot xizmati xabar berdi.
Yangilangan ob-havo prognozlariga ko‘ra, sovuq havo massasining mamlakatning boshqa hududlariga kirib kelishi ehtimoli tufayli isitish mavsumi uchun belgilangan 500 kub metrlik bazaviy meyor 2026-yil 15-martga qadar amal qiladi.
15 martdan keyin esa ob-havo sharoitidan kelib chiqib, zarur hollarda qo‘shimcha qarorlar qabul qilinishi mumkin.
Eslatib o‘tamiz, O‘zbekistonda aholi uchun tabiiy gaz iste’moli bosqichma-bosqich tarif asosida hisoblanadi. Isitish mavsumida oyiga 500 kub metrgacha gaz 1 kub metr uchun 1000 so‘mdan bazaviy narxda hisoblanadi.
Belgilangan meyordan ortiq iste’mol qilingan gaz esa 1 kub metr uchun 1800 so‘m va undan yuqori tariflarda hisoblanadi.
15 martdan boshlab, agar qo‘shimcha qaror qabul qilinmasa, bazaviy meyor oyiga 100 kub metrni tashkil etadi.