Toshkentda XI robototexnika ko‘rgazmasi bo‘lib o‘tdi - foto

TOShKENT, 26 fev — Sputnik. 2026 yil 25-fevral kuni an’anaviy Toshkent politexnika muzeyi "Robot – 2026" ko‘rgazmasi muvaffaqiyatli o‘tkazildi.

1737 yilda Jak de Vokanson tomonidan yaratilgan ilk ishlaydigan odamsimon robot insoniyat tarixida muhim voqea sifatida qayd etilgan. Inson o‘lchamidagi ushbu android nayda kuy chalish qobiliyatiga ega bo‘lib, uning repertuarida 12 ta musiqiy asar mavjud bo‘lgan. Ixtirochi 1709-yil 24-fevralda tug‘ilgan bo‘lib, aynan shu sana Toshkent politexnika muzeyida robotlar ko‘rgazmasini o‘tkazish an’anasining boshlang‘ich nuqtasiga aylangan.

Bu yil o‘n birinchi marotaba tashkil etilgan ko‘rgazma shahar aholisi, mehmonlar va ayniqsa robototexnikaga qiziquvchi yoshlar orasida katta qiziqish uyg‘otdi. Tadbirda Turin politexnika universiteti Toshkent filiali, Muhammad al-Xorazmiy nomidagi Toshkent axborot texnologiyalari universiteti, Islom Karimov nomidagi Toshkent davlat texnika universiteti hamda "Kyelajak" respublika markazining tuman va viloyat bo‘limlari vakillari ishtirok etishdi.

Ko‘rgazma doirasida universitet talabalari tomonidan yaratilgan turli robotlar – xizmat ko‘rsatuvchi modellar, intellektual boshqaruv tizimlari va ta’limiy robotlar namoyish etildi. Tashrif buyuruvchilar har bir ishlanma bilan yaqindan tanishish, mualliflar bilan muloqot qilish imkoniga ega bo‘lishdi.

Toshkent politexnika muzeyi tomonidan o‘tkazilgan mazkur tadbir yosh avlodni texnika va ilmiy-tafakkur yutuqlariga jalb etishda alohida ahamiyat kasb etadi. Bugungi kunda robototexnika va kibernetika sohalarining jadal rivojlanishi zamonaviy jamiyat taraqqiyotining ajralmas qismiga aylangan.

"Robot – 2026" ko‘rgazmasi esa yosh ixtirochilar uchun o‘z iqtidorini namoyon etish va kelajakdagi rivojlanishlari uchun mustahkam zamin yaratdi.