TOShKENT, 26 fev — Sputnik. Sankt-Peterburgda o‘tib ketayotgan fuqarolar kurtkasini cho‘zib, o‘ninchi qavat derazasidan tushib ketgan bir yarim yoshli bolani ushlab qolishdi. Bu haqda RIA Novosti favqulodda xizmatlarga tayanib xabar berdi.
Ma’lum qilinishicha, voqea chorshanba kuni Bogatirskiy xiyobonida joylashgan kvartirada sodir bo‘lgan. Hodisa paytida xonadonda bolaning onasi va akasi bo‘lgan. Onasi hojatxonaga kirgan, akasi esa kompyuter o‘ynayotgan bo‘lgan.
Favqulodda xizmatlar ma’lumotiga ko‘ra, ayol bolani kvartira ichida qidirib, xonadagi deraza ochiq ekanini ko‘rgan. Tashqariga qaraganda, deraza ostida odamlar to‘planganini payqab, darhol ko‘chaga tushgan. Bolani pastda turgan o‘tib ketayotgan shaxslar kurtkani cho‘zib ushlab qolgan, u kurtka ustiga tushgan.
Sankt-Peterburg prokuraturasi hodisaning barcha tafsilotlari o‘rganilayotganini ma’lum qildi.
Bu shaharda bir hafta ichida qayd etilgan ikkinchi shunday holatdir. 22-fevral kuni o‘zbekistonlik Xayrullo Ibadullayev yettinchi qavat derazasidan tushib ketgan bolani ushlab qolib, uning hayotini saqlab qolgan.