TOShKENT, 15 fev — Sputnik. Germaniyada Yevropa Ittifoqi yetakchilarining Vladimir Zelenskiy bilan Ukrainani moliyalashtirish bo‘yicha muzokaralari muvaffaqiyatsizlikka uchradi. Bu haqda Spiegel nashri xabar bergan, deb yozadi RIA Novosti.
"Yevropaliklar moliyalashtirish bilan bog‘liq muammolarga yechim topa olmadi. Munxendagi konferensiya doirasida Ukraina tarafdorlarining prezident Zelenskiy bilan uchrashuvida Berlinning muzlatilgan Rossiya aktivlaridan 90 milliard yevrodan ortiq mablag‘ni AQShdan qurol-yarog‘ sotib olish uchun ishlatish taklifi <...> muvaffaqiyatsizlikka uchradi", — deyiladi materialda.
Nemis jurnali ma’lumotlariga ko‘ra, bu Ukraina Qurolli kuchlari uchun o‘q-dorilar tugayotgan o‘ta zaif nuqtada sodir bo‘lgan.
"Bu mamlakat rahbariga mojaro paytida eshitilishi mumkin bo‘lgan eng yomon narsalardan biri: havo kuchlari qo‘mondoni zenit qurilmalari bo‘sh ekanligini aytganda", — deya Zelenskiyning konferensiyadagi so‘zlarini keltiradi nashr.
Frontdagi muammolar tufayli Zelenskiy Davosda tanqid qilgan yevropalik hamkorlariga nisbatan ritorikani o‘zgartirishga majbur bo‘lgani ta’kidlanadi. Uning tanqidi Kiyevga yordam masalasida hech narsani hal qilmayotgan Jo Bayden ma’muriyatiga qaratilgan.
Ukraina so‘nggi bir necha yil ichida rekord darajadagi taqchillikka ega budjet qabul qildi. Bu yilgi kamomad 1,9 trillion grivna (45 milliard dollar)ni tashkil etmoqda. Kiyev ushbu kamomadni G‘arb yordami hisobidan qoplashga umid qilmoqda.
Oliy rada deputati Dmitriy Razumkovning ta’kidlashicha, pul, jumladan, harbiylar maoshi va qurol-yarog‘ uchun mablag‘ fevral oyidayoq yetmay qolishi mumkin.
Munxendagi konferensiya doirasida Zelenskiy ishtirok etgan panel muhokamasiga qiziqish past bo‘lgani ham xabar qilindi. Oliy Rada deputati Aleksey Goncharenko* o‘z ijtimoiy sahifasida zalda ko‘plab bo‘sh o‘rinlar bo‘lganini yozgan.
"Zelenskiy bilan panel muhokamasi oxirida birinchi qatorlar shunday ko‘rinishga ega bo‘ldi. Juda ko‘p odamlar shunchaki ketishdi", — deya izoh berdi siyosatchi.
Uning so‘zlariga ko‘ra, amerikalik amaldorlar Zelenskiyning nutqini o‘tkazib yuborgan.
"Bunday munozaralar va nutqlarga odatda ko‘plab odamlar tashrif buyuradi, ayniqsa bu Munxen konferensiyasi, bu yerda yuqori martabali mehmonlar ko‘p. Ammo Zelenskiyning omadi kelmadi. <...> Senatorlar va kongressmenlar bu tadbirni e’tiborsiz qoldirgan ko‘rinadi", — dedi Goncharenko*.
Xavfsizlik bo‘yicha Munxen konferensiyasi 13–15 fevral kunlari bo‘lib o‘tmoqda.
* Rossiyada terrorchi va ekstremistlar ro‘yxatiga kiritilgan jismoniy shaxs