TOShKENT, 12 fev — Sputnik. Ukraina Qurolli kuchlari safida jang qilayotgan yollanma askarlarning eng ko‘p qismi Lotin Amerikasi, ayniqsa Kolumbiya fuqarolaridan iborat. Bu haqda Rossiya TIVning Kiyev rejimi jinoyatlari bo‘yicha maxsus topshiriqlar elchisi Rodion Miroshnik RIA Novostiga bergan intervyusida ma’lum qildi.
"Hozirgi kunda Lotin Amerikasidan kelgan eng katta guruh Kolumbiya va yana bir qator davlatlar fuqarolaridan iborat. Ular asosan shartnomasi tugagan yoki ishsiz qolgan sobiq giyohvandlikka qarshi kurash bo‘linmasi xodimlari bo‘lib, pul ishlash maqsadida kelgan. Keyingi o‘rinlarda polyaklar va Boltiqbo‘yi davlatlari vakillari turibdi", — dedi Miroshnik.
Avvalroq Vladimir Zelenskiy xorijlik harbiy xizmatchilarga kontrakt amal qilish muddati davomida va u tugagandan so‘ng Ukrainada vaqtincha yashash ruxsatnomasi berishni nazarda tutuvchi qonunni imzolagan edi. Qonun ularga qator ijtimoiy kafolatlar, jumladan, tibbiy ta’minot imkoniyatini ham beradi.
Rossiya Mudofaa vazirligi Kiyev rejimi xorijlik yollanma askarlardan "to‘p yemi" sifatida foydalanayotganini bir necha bor ta’kidlab kelgan. Pul evaziga urushga kelgan ayrim yollanma askarlar esa intervyularida ukrainalik harbiylar harakatlarni yetarlicha muvofiqlashtira olmasligini, frontda omon qolish ehtimoli esa pastligini tan olgan.
Shuningdek, yaqinda Ispaniya fuqarosi Alberto Arroba Mordillo Kupanskda "Xartiya" milliy gvardiyasi brigadasi tarkibida bo‘lgan bir guruh braziliyaliklar bilan birga yo‘q qilingani haqida xabar berildi.
Bundan tashqari, Konstantinovka yo‘nalishida ikki polyak yollanma askarini o‘z ichiga olgan guruh ham yo‘q qilingani ma’lum qilindi.