TOShKENT, 11 fev — Sputnik. "Financial Times"ning Ukraina va G‘arb rasmiylariga tayanib yozishicha, Kiyev prezidentlik saylovlarini tinchlik kelishuvi bo‘yicha referendum bilan bir vaqtda o‘tkazish imkoniyatini muhokama qilmoqda.
Nashrga ko‘ra, bu muhokamalar Donald Tramp ma’muriyati pozitsiyasidan so‘ng faollashgan. AQSh tomoni Kiyevdan ikkala ovoz berishni ham 15-maygacha o‘tkazishni talab qilgan. Aks holda Ukraina AQSh taklif etgan xavfsizlik kafolatlaridan mahrum bo‘lishi mumkin.
Manbalarning aytishicha, Vladimir Zelenskiy 24-fevral kuni saylovlar va referendum rejasi haqida bayonot berishi mumkin. U avvalroq AQSh Ukrainadagi mojaro yozgacha yakunlanishini istashini aytgan.
Ma’lum qilinishicha, Ukraina parlamenti mart-aprel oylarida harbiy holat sharoitida saylov o‘tkazishga ruxsat beruvchi huquqiy o‘zgarishlarni ko‘rib chiqishi mumkin.
"Reuters" ham manbalarga tayanib, referendum milliy saylovlar bilan bir vaqtda o‘tkazilishi mumkinligini xabar qilgan. Manbalardan biriga ko‘ra, ovoz berishni olti oydan kam vaqt ichida tashkil etish mumkin.
Shu bilan birga, Rossiya prezidenti matbuot kotibi Dmitriy Peskov ushbu xabarlarga izoh berib, ommaviy axborot vositalaridagi ma’lumotlarga ehtiyotkorona munosabatda bo‘lish va birlamchi manbalarga tayanish kerakligini ta’kidladi. Uning aytishicha, hozircha rasmiy bayonotlar yo‘q.
"Bu haqda gapirishga hali erta. Biz aslida qandaydir manbalar tomonidan matbuot orqali shunday xabarlar almashuviga egamiz. Manba saylovga tayyorgarlik boshlanganini aytdi, keyin ma’muriyatdagi, Kiyev rejimi ofisidagi manba ham bunday emasligini aytdi, bu ma’lumotni rad etdi", — dedi Peskov jurnalistlarga.