TOShKENT, 10 fev — Sputnik. Yevroosiyo iqtisodiy komissiyasi (YeIK) shtab-kvartirasida Mo‘g‘uliston biznesi vakillari uchun Yevroosiyo iqtisodiy ittifoqi (YeOII) va Mo‘g‘uliston o‘rtasidagi vaqtinchalik savdo kelishuvining amaliy jihatlari bo‘yicha seminar o‘tkazildi. Bu haqda YeIK matbuot xizmati xabar berdi.
YeIK hay’ati raisi Bakitjan Sagintayevning ta’kidlashicha, kelishuv biznesga yo‘naltirilgan bo‘lib, uning asosiy maqsadi o‘zaro savdoni soddalashtirish, xarajatlarni kamaytirish va ishbilarmonlik aloqalarini kengaytirishdan iborat.
Hujjat kuchga kirgandan so‘ng tomonlar uchun 367 ta tovar pozitsiyasi bo‘yicha bojxona to‘lovlari nolga tushiriladi yoki kamaytiriladi. Bu YeOII davlatlari va Mo‘g‘uliston tadbirkorlari uchun bozorlarga imtiyozli kirish imkonini beradi.
Kelishuvda kichik va o‘rta biznes uchun qulay bo‘lgan zamonaviy hamkorlik formatlari, jumladan raqamli kommunikatsiyalar ham nazarda tutilgan.