TOShKENT, 9 fev — Sputnik. "Golden Eagle Luxury Trains" Markaziy Osiyo orqali 22 kunlik "Buyuk Ipak yo‘li" temir yo‘l sayohatini yo‘lga qo‘yadi.
Yo‘nalish Pekindan boshlanib Toshkentda yakunlanadi. Uzunligi 3 862 km bo‘lgan sayohat Xitoy, Qozog‘iston, Qirg‘iziston, Tojikiston va O‘zbekiston hududlaridan o‘tadi. Dastur qadimiy Ipak yo‘lidagi YuNESKO merosi obyektlari atrofida tuzilgan.
Xitoyda sayyohlar Taqiqlangan shahar, Buyuk Xitoy devori, Siandagi Terrakota armiyasi va Dunxuandagi Mogao g‘orlarini ko‘radi.
O‘zbekiston qismi sayohatning markaziy nuqtalaridan biri hisoblanadi. Yo‘nalishga YuNESKO ro‘yxatiga kiritilgan Samarqand, Buxoro va Xiva kiritilgan.
Qo‘shimcha tajribalar qatorida Gobi cho‘lida tuya minish va Olmaotaga xususiy aviaparvoz ham bor.
Sayohat ikkita lyuks poyezdda amalga oshiriladi. Vagonlar La Belle Epoque uslubida bezatilgan. Yo‘lovchilar uchun bir nechta klassdagi kayutalar, shaxsiy sanitar xonalar, panoramali derazalar, restoran va pianino bar ko‘zda tutilgan.
22 kunlik sayohat narxi bir kishi uchun 50 700 dollardan (ikki kishilik joylashuv) boshlanadi. Narxga yashash, ovqatlanish, transferlar va sug‘urta kiritilgan.
Birinchi reys 2026-yil 21-sentabrdan 12-oktabrgacha rejalashtirilgan.