TOShKENT, 1 fev — Sputnik. Yaqin Sharq atrofidagi keskin siyosiy bayonotlar fonida Eronning Yevropa Ittifoqi va AQSh bilan munosabatlari yanada taranglashdi.
Eron oliy rahbari Ali Xomanaiyning aytishicha, agar AQSh urush boshlasa, bu safar urush mintaqaviy miqyos kasb etadi.
"AQSh shuni bilishi kerakki, agar ular urush boshlasa, bu safar urush mintaqaviy miqyosga ega bo‘ladi", — dedi Xomanaiy.
Bu bayonot Yevropa Ittifoqi tomonidan Eronning 15 nafar mansabdori va oltita yuridik shaxsiga nisbatan sanksiyalar joriy etilgani ortidan yangradi. YeI diplomatiyasi rahbari Kaya Kallasning ma’lum qilishicha, ittifoq Eron Qurolli kuchlari islomiy inqilob gvardiyasini terrorchilik tashkilotlari ro‘yxatiga kiritishga qaror qilgan.
Bunga javoban Eron parlamenti YeIga a’zo davlatlar qurolli kuchlarini terrorchi tashkilotlar deb tan oldi.
Shuningdek, parlament prezidiumi a’zosi Alirizo Salimiy Yevropa davlatlarining harbiy attashelari Eron hududini tez orada tark etishi kerakligini bildirdi.
"Elchixonalarimizda joylashgan Yevropa davlatlarining harbiy attashelari mamlakat hududini tark etishi kerak. Terrorchilarni mamlakatda qoldirish amaldagi qonunga zid", — dedi Salimiy.
Eron tashqi ishlar vaziri Abbos Arakchi YeI strategik xatoga yo‘l qo‘yayotganini aytgan bo‘lsa, islom respublikasi Qurolli kuchlari bosh shtabi bu qaror uchun javobgarlik Yevropa siyosatchilari zimmasiga tushishini ta’kidladi.
Shu fonda AQShning NATOdagi doimiy vakili Mettyu Uitaker Vashington Eron bilan munosabatlarda "Liviya ssenariysi"ni takrorlashni istamasligini bildirdi.
"Biz Eron kabi davlatni Liviyada Obama ma’muriyati davrida Muammar Qazzofiy ag‘darilganidagidek beqarorlashtirishni istamaymiz. O‘shanda hokimiyat almashgandan keyingi davr uchun aniq reja yo‘q edi. Shuning uchun kuch ishlatishda ehtiyotkor bo‘lishimizga to‘g‘ri keladi. Ammo, yana bir bor aytaman, to‘p ular tomonida va prezident Donald Tramp ularga nisbatan sabrli bo‘lmaydi", — dedi u Fox News telekanaliga bergan intervyusida.
Avvalroq AQSh prezidenti Donald Tramp "ulkan armada" Eron tomon yo‘l olayotganini aytib, Tehron muzokaralar stoliga o‘tirishiga umid bildirgan edi. U, shuningdek, 2025-yil iyun oyida AQShning "Midnight Hammer" operatsiyasi doirasida Eron yadroviy obyektlariga zarba berilganini eslatib, "keyingi hujum bundan ham og‘irroq bo‘lishi mumkin"ligini ta’kidlagan.