TOShKENT, 25 yanv — Sputnik. Chexiyaning L-159 samolyotlarini Ukrainaga yetkazib berish ehtimoli haqidagi muhokamalar sun’iy xarakterga ega bo‘lib, bu samolyotlar Ukrainaga berilmaydi. Bu haqda Chexiya bosh vaziri Andrey Babish matbuot anjumanida ma’lum qildi, deb xabar berdi RIA Novosti.
Uning so‘zlariga ko‘ra, bu masala yopiq va L-159 samolyotlarini Ukrainaga berish yoki sotish haqidagi har qanday keyingi muhokamalar istisno qilinadi.
"Chexiyaning L-159 samolyotlarini Ukrainaga yetkazib berish imkoniyati haqidagi bahslar sun’iy. Ukraina uchun hech qanday L-159 yo‘q va bo‘lmaydi. Bu mavzu yopiq", — dedi Babish.
Avvalroq, 23-yanvar kuni Chexiya armiyasi bosh shtabi boshlig‘i general Karel Rjegka jurnalistlarga to‘rtta L-159 samolyotini Ukrainaga topshirish Chexiya xavfsizligiga ta’sir qilmasligini aytgan edi. Uning fikricha, bu samolyotlar mamlakatning havo hujumidan mudofaa tizimida katta ahamiyatga ega emas va hozirda asosan mashg‘ulot vositasi sifatida qo‘llanilmoqda.
Rjegka, shuningdek, L-159 samolyotlari asta-sekin foydalanishdan chiqarilishi kutilmoqda, deya ta’kidlagan.
Babishning ta’kidlashicha, bosh shtab boshlig‘i o‘z fikrini mudofaa vaziri Yaromir Zuna ilgari bildirgan pozitsiyasiga qarshi qo‘ya olmaydi. Zuna esa Chexiya armiyasiga L-159 samolyotlari zarurligini ma’lum qilgan edi.
Chexiya prezidenti Petr Pavel 18-yanvar kuni o‘tkazilgan matbuot anjumanida Ukraina tomoni L-159 samolyotlarini dronlarga qarshi kurashishda juda mos deb baholayotganini aytgan edi.
Uning so‘zlariga ko‘ra, bu masala kamida yarim yildan beri muzokara mavzusi bo‘lib kelmoqda. Dastlab samolyotlarni Ukrainaga ijaraga berish, keyin esa sovg‘a qilish masalasi muhokama qilingan. Keyinroq Vladimir Zelenskiy to‘rtta L-159 samolyotini sotib olish taklifini bildirgan.