TOShKENT, 12 yanv — Sputnik. Yevroosiyo iqtisodiy komissiyasi kengashi jismoniy shaxslar tomonidan xorijiy marketpleyslarda sotib olinadigan elektron tijorat tovarlarini olib kirish shartlari va qoidalarini belgilovchi bir qator qarorlar qabul qildi.
Xususan, bojsiz olib kirish chegarasi keyinchalik qayta ko‘rib chiqish imkoniyati bilan 200 yevro etib belgilandi. Agar ushbu qiymatdan oshib ketsa, milliy miqyosda belgilangan QQS stavkalaridan 5% ortiq, biroq har bir kilogramm uchun 1 yevrodan kam bo‘lmagan miqdorda butun xarid qiymatidan bojxona boji undiriladi. Ayrim turdagi tovarlar, masalan, avtomobillar uchun bojxona bojlarining alohida stavkalari belgilangan.
Bundan tashqari, Yevroosiyo iqtisodiy ittifoqi Bojxona kodeksiga (YeOII BK) tuzatishlarda nazarda tutilgan elektron tijoratning ixtisoslashtirilgan deklaratsiyasini qo‘llash qismida soddalashtirilmagan holda deklaratsiyalanadigan tovarlar ro‘yxati tasdiqlandi.
Ro‘yxat Ittifoqning amaldagi qoidalariga muvofiq shaxsiy foydalanish uchun mo‘ljallangan ayrim tovarlarga (solyariylar, ichki yonuv dvigatellari, tibbiy mebel, o‘yin avtomatlari), olib kirish yoki chiqarish uchun maxsus ruxsat talab etiladigan tovarlarga (qurol-yarog‘, o‘q-dorilar, qazilma hayvonlar suyaklari, xavfli chiqindilar), shuningdek alkogolli ichimliklar, tamaki mahsulotlari, naqd pul, havo va suv kemalari hamda ayrim transport vositalari va ularning shassilariga tegishli xaridlarga taalluqli.
Yangi tartib 1-iyuldan joriy etilishi rejalashtirilgan.