Ko‘pchilik uchun Yangi yil kechasi - bu kurantlar urilishi va olivye, turli taomlar hamda mandarinlar bilan oilaviy dasturxon atrofida ziyofat. Ammo ish kunlari ham, bayramlarda ham o‘z xizmat vazifalarini mas’uliyat bilan bajaradiganlar bor. Ular orasida Toshkent metropolitenining “Qipchoq” bekati markazlashtirilgan post navbatchisi Nozira Yusupaliyeva ham bor.
U o‘z ish faoliyati davomida uch marta Yangi yil kechasi navbatchilik qilgan.
“Bu ham yaxshi, ham yomon, chunki farzandlarimning oldida, oilam davrasida bo‘lmayman. Lekin yaxshi tomoni — hamkasblarim bilan yaxshi kayfiyatda Yangi yilni kutib olamiz”, – deydi u.
Bayram kunlari metro alohida grafik bo‘yicha ishlaydi, poyezdlar soni ko‘payadi, harakat oralig‘i qisqaradi, yo‘lovchilar oqimi sezilarli darajada oshadi. Bu kunlarda metrodan asosan yoshlar va farzandli oilalar foydalanadi. Ayrimlari yaqinlarini tabriklashga shoshilsa, boshqalari bolalariga chiroyli yasatilgan archa ko‘rsatish va yaqinlariga ijobiylik hamda ajoyib kayfiyat ulashishga intiladi.
Metropoliten xodimlari bayram kunlarida imkon qadar bekatlarni yaltiroq bezak, girlyanda va sharlar bilan yasatishga harakat qilishadi.
Soat 12 bo‘lganda, barcha metro xodimlari o‘z ish joylarida qoladi - xizmat uzluksiz davom etadi. Yo‘lovchilar esa, o‘z navbatida, xodimlarni tabriklaydi, ishlari uchun minnatdorchilik bildirib, Yangi yil bilan qutlaydi.
Bayram kunlarida ajoyib va g‘ayrioddiy voqealar ro‘y beradi. Masalan, o‘tgan yillarning birida bayram arafasida bo‘lib o‘tgan Qorbobolar fleshmobi.
Bunday lahzalar, Nozira Yusupaliyevaning fikricha, ayniqsa qadrli. Ular odamlarga o‘zgacha his-tuyg‘ular bag‘ishlaydi.
Nozira metropolitenda 8-yildan beri ishlaydi. U farroshlik lavozimida ish boshlagan. Ammo o‘sishni xohlagani bois, texnika maktabida ta’lim olib, uni a’lo baholarga tugatgan va bekat navbatchisi bo‘lgan.
Shu vaqt mobaynida u poytaxt metrosining “Paxtakor”, “Buyuk ipak yo‘li”, “Chorsu”, “Alisher Navoiy”, “Xalqlar do‘stligi”, “Rohat”, “Qipchoq” kabi ko‘plab bekatlarida ishladi.
“Bizning ish xizmat vazifalarimiz – ziyrak holda ishlashimiz, yo‘lovchilarning xavfsizligini ta’minlash va poyezdlarning xavfsizligini ta’minlash. Bizga biriktirilgan bekatning tozaligini saqlagan holda ish faoliyatimizni yuritishimiz kerak. Yo‘lovchilarga o‘ta xushmuomalalik bilan munosabatda bo‘lamiz. Bayram kunlarida ham bu qoidalar o‘zgarishsiz qoladi”, - deydi u.
Yusupaliyevaning fikricha, uning ishining eng muhim jihatlaridan biri odamlar bilan muloqot qilishdir.
U ayniqsa “Chorsu” bekatidagi ishini iliq xotiralar bilan eslaydi. Bozorning yaqinligi navbatchilikni haqiqatan ham samimiy qilardi: yo‘lovchilar ko‘pincha xodimlarni mevalar bilan siylab, minnatdorchilik va insoniy e’tibor ramzi sifatida kichik sovg‘alar qilishardi.
Xizmatdan tashqari vaqtda Nozira ikki o‘g‘ilning onasi. Kattasi 17 yoshda, kichigi 12 da. Ular onalari bilan juda faxrlanadi va uni har jihatdan qo‘llab-quvvatlashadi.
Nozira Yusupaliyevaning 2026-yilda erishish uchun harakat qiladigan kasbiy orzusi bor - poyezd dispetcheri lavozimiga ko‘tarilish. Buning uchun, uning aytishicha, yanada ko‘proq o‘qib-o‘rganish va o‘z ustida ishlash kerak.
Batafsil - Sputnik videosida.