TOShKENT, 12 dek – Sputnik. O‘zbekistonda telekommunikatsiya xizmatlari sifati monitoringi uchun “Raqamli nazorat” platformasi ishga tushadi. Prezident tegishli qarorni imzoladi.
2027 yil 1-yanvargacha ishga tushadigan platforma quyidagi imkoniyatlarga ega bo‘ladi.
aholi istiqomat qilayotgan, jumladan, olis va chekka hududlardagi raqamli texnologiyalar va telekommunikatsiyalar sohalarida ko‘rsatilayotgan xizmatlarni monitoring qilish;
axborot tizimlari, resurslari, dasturiy mahsulotlar va ma’lumotlar bazalarida yuzaga kelgan uzilish yoki to‘xtalish holati bo‘yicha tegishli choralar ko‘rish.
U jismoniy va yuridik shaxslardan kelib tushgan murojaatlar tezkor ko‘rib chiqilishini ham tashkil etadi.
Hujjatga ko‘ra, raqamli texnologiyalar vazirligi huzuridagi Axborotlashtirish va telekommunikatsiyalar sohasida nazorat inspeksiyasi quyidagi sohalarda maxsus vakolatli davlat organi etib belgilandi:
axborotlashtirish, telekommunikatsiyalar, pochta aloqasi, raqamli texnologiyalar sohalarida davlat nazoratini amalga oshirish;
ommaviy axborot vositalarini ro‘yxatga olish hamda ular tomonidan qonunchilik hujjatlari talablariga rioya qilinishini monitoring va nazorat qilish;
bolalarni ularning sog‘lig‘iga zarar yetkazuvchi axborotdan himoya qilish.