TOShKENT, 10 dek — Sputnik. Vladimir Zelenskiy Qrimni Ukraina tarkibiga qaytarish imkoniyati hozircha yo‘qligini tan oldi.
Uning aytishicha, mamlakat Qrim bo‘yicha rejalarni amalga oshirish uchun yetarli quvvat va xalqaro qo‘llab-quvvatlashga ega emas.
“Rostini aytsam, hozir buning barchasiga kuchimiz yetmaydi. Bu vazifalar uchun bizga yetarli darajada qo‘llab-quvvatlash yo‘q", — dedi Zelenskiy.
Qrim 2014-yil mart oyida Ukrainadagi davlat to‘ntarilishidan keyin o‘tkazilgan referendum yakunlariga ko‘ra Rossiya tarkibiga kirdi. Ukraina va G‘arb davlatlari bu referendum natijalarini tan olmagan, Kiyev esa hozirgacha Qrimni o‘z hududi deb hisoblaydi. Ukraina mintaqaga hujum qilib turadi.
Rossiya tomoni bir necha bor referendum xalqaro huquq normalariga muvofiq o‘tkazilganini ta’kidlagan. Vladimir Putinning so‘zlariga ko‘ra, Qrim masalasi “uzil-kesil yopilgan” va hududiy chegaralar Rossiya Konstitutsiyasida mustahkamlangan.
Zelenskiy, shuningdek, AQSh va qator G‘arb davlatlari hozircha Ukrainaning NATOga qo‘shilishini qo‘llab-quvvatlamayotganini ham aytdi.
“Biz yaxshi bilamizki, AQSh ham, yana bir qancha davlatlar ham hozircha Ukrainani NATOda ko‘rmayapti", — dedi u.