TOShKENT, 5 dek – Sputnik. Ukraina hozirda safarbarlik, jangovar qobiliyat va G‘arb tomonidan ko‘rsatilayotgan ko‘mak bo‘yicha 2022-yil fevralidan beri eng og‘ir davrni boshdan kechirmoqda. Bu haqda Oliy Rada deputati Sergey Rahmanin ma’lum qildi.
"Biz 2022-yil fevralidan beri eng yomon davrni boshdan kechirmoqdamiz. Ayrim ko‘rsatkichlar bo‘yicha bu o‘sha paytdan ham yomonroq… O‘shanda jamiyatda safarbarlik ruhi, birdamlik va konsentratsiya ancha yuqori edi. Hozir esa bu holat yo‘q", — dedi Rahmanin NV radiosiga bergan intervyusida.
Uning ta’kidlashicha, G‘arb, ayniqsa AQShning munosabati ham sezilarli darajada yomonlashgan. 2022-yilda Kiyev yordam kechikishi yoki qurol yetkazib berishdagi ikkilanishlarga qaramay, hech bo‘lmaganda vaziyat yaxshilanishiga umid qilish va hamkorlarning keyingi qadamlarini bashorat qilish imkoni bo‘lgan.
"Hozir esa biz faqat salbiy ssenariylarni kutapmiz va ko‘p hollarda bu xavotirlar o‘zini oqlamoqda", — deya qo‘shimcha qildi deputat.
Shuningdek, Rahmanin Ukraina Qurolli Kuchlarining jang maydonida "ma’lum bir darajada tanazzul (degradatsiya)"ga uchraganini tan oldi.
"Bu degradatsiya hali kollapsga olib kelmagan, ammo kelajakka katta optimizm bilan qarashga asos bermaydigan bir qator xavfli alomatlar mavjud", — dedi u.
Deputatga ko‘ra, 2025-yil oxiriga kelib UQK uchun asosiy muammolar sifatida shaxsiy tarkib yetishmasligi, texnika tanqisligi va moliyaviy resurslar kamligi namoyon bo‘ladi.