Xodjayev: O‘zbekiston-Rossiya hisob-kitoblarining 75 foizi milliy valyutalarda amalga oshmoqda

TOShKENT, 3 dek – Sputnik. Toshkentda o‘tkazilayotgan O‘zbekiston–Rossiya Hukumatlararo komissiyasining 26-yig‘ilishida bosh vazir o‘rinbosari Jamshid Xodjayev ikki mamlakat o‘rtasidagi iqtisodiy hamkorlikning hozirgi holati va istiqbollari haqida ma’lumot berdi, deb xabar beradi Sputnik muxbiri.

Boz vazir o‘rinbosarining aytishicha, O‘zbekistonda Rossiya kapitali ishtirokida 3000 dan ortiq kompaniya faoliyat yuritmoqda.

"Rossiya xorijiy kapital ishtirokidagi korxonalar soni bo‘yicha yetakchi o‘rinlardan birini egallaydi", — dedi Xodjayev.

U, shuningdek, ikki davlat o‘rtasidagi qo‘shma investitsiya loyihalari portfeli 55 milliard dollardan oshganini qayd etdi.

"Faqat 2025-yilning o‘zida 5 milliardga yaqin Rossiya investitsiyalarini o‘zlashtirishni kutmoqdamiz. Bu yangi ishlab chiqarish, ish o‘rinlari va soliq tushumlari shaklida jiddiy samara berishi kerak", — dedi bosh vazir o‘rinbosari.

Xodjayevga ko‘ra, 2024–2025 yil yakunlari bo‘yicha O‘zbekiston Rossiya qishloq xo‘jaligi mahsulotlarining eng yirik xaridorlaridan biriga aylangan. Savdoda nafaqat xomashyo, balki tayyor sanoat tovarlari, to‘qimachilik va qayta ishlash mahsulotlari ulushi ham oshib bormoqda.

U Rossiya orqali oziq-ovqat va qishloq xo‘jaligi mahsulotlari eksportidagi o‘sishni yuqori baholar ekan, qo‘shimcha qildi:

"Savdo hajmining oshishi, albatta, qayta ishlash va kooperatsiyani chuqurlashtirish hisobiga ta’minlanishi muhim," — dedi u.

Shuningdek, Xodjayev Rossiya bilan Sanoat injiniring markazi tashkil etish tashabbusini ilgari surdi. Toshkent, Jizzax, Buxoro va Navoiydagi qo‘shma sanoat maydonchalari allaqachon ikki tomonlama kooperatsiyaning asosiga aylanib borayotganini ta’kidladi.

"‘Innoprom. Markaziy Osiyo’ yakunlari bo‘yicha qariyb 4 milliard dollarlik kelishuvlar imzolandi. Biz taqdimotlardan ishlab chiqarish quvvatlarini amaliy ishga tushirish bosqichiga o‘tapmiz", — dedi bosh vazir o‘rinbosari.

Xodjayev ikki mamlakat o‘rtasidagi to‘lovlar tizimida milliy valyutalar ulushi oshib borayotganini ham ma’lum qildi:

"O‘zaro hisob-kitoblarning 75 foizdan ortig‘i milliy valyutalarda amalga oshirilmoqda", — dedi u.

U bu jarayonni to‘lov kanallarini rivojlantirish, tizimlarni integratsiya qilish va kiberxavfsizlikni oshirish orqali mustahkamlash zarurligini qayd etdi.

Xodjayevga ko‘ra, 2026-yilgacha yangi qo‘shma loyihalar puli shakllantiriladi. U hozirgi hamkorlik mexanizmlarining o‘ziga xosligini ta’kidladi:

“Hech bir davlat bilan bunday platforma yo‘q — maxsus sanoat zonalari, injenerlik maktablari va qo‘shma yo‘nalishlar kabi imkoniyatlar faqat shu hamkorlikda mavjud", — dedi O‘zbekiston bosh vaziri o‘rinbosari.

So‘zining yakunida Xodjayev sun’iy intellekt loyihalari uchun soliq imtiyozlari berilgan maxsus zona tashkil etilganini bildirdi.

"Rossiya IT-kompaniyalari va moliya institutlari ushbu loyihalarda infratuzilma va amaliy yechimlar bo‘yicha ishtirok etishiga umid qilamiz", — dedi u.

O‘zbekiston va Rossiya o‘rtasidagi tovar ayirboshlash yil oxirigacha 12 mlrd dollarga yetadi

3 Dekabr, 14:06