TOShKENT, 29 noya — Sputnik. Markaziy bank naqd pulsiz hisob-kitoblar uchun universal kodni joriy etishga tayyorlanmoqda. Bu prezidentning O‘zbekistonda moliyaviy texnologiyalar sohasini rivojlantirishga qaratilgan qarorida belgilangan.
Universal QR-kod pilot loyihasi 2025-yilning dekabr oyida sinov tariqasida ishga tushiriladi. Loyihada banklar va to‘lov institutlari ishtirok etadi.
Kelasi yil boshigacha universal QR-kod bo‘yicha tegishli normativ-huquqiy hujjat loyihasini ishlab chiqish va tasdiqlash vazifasi topshirilgan. Fevraldan esa to‘lov xizmatlari bozorida QR-kod amaliyotga joriy etish ko‘zda tutilmoqda.
Aprel oyida Markaziy bankning To‘lov tizimlari departamenti rahbari o‘rinbosari Miraziz Mirhayotov O‘zbekistonda naqd pulsiz hisob-kitoblarda universal to‘lov QR-kodini yaratish rejalashtirilayotganini ma’lum qilgandi.