TOShKENT, 15 okt — Sputnik. O‘zbekiston prezidenti Shavkat Mirziyoyev 15-oktabr kuni Saudiya Arabistoni Podshohligi investitsiyalar vaziri Xolid al-Falihni boshchiligidagi yetakchi kompaniyalari rahbarlaridan iborat nufuzli delegatsiyani qabul qildi.
Muzokaralar chog‘ida samarali hamkorlik jadal rivojlanib borayotgani, o‘zaro savdo hajmi, to‘g‘ridan-to‘g‘ri investitsiyalar va qo‘shma korxonalar soni ortib borayotgani va ikki davlat orasida aviaqatnovlar ko‘paygani mamnuniyat bilan qayd etildi.
Xususan, qo‘shma loyihalar portfeli 27 milliard dollarga yetgani va "ACWA Power" kompaniyasi bilan energetika sohasida 15 milliard dollarlik qator yirik loyihalar amalga oshirilayotgani aytib o‘tildi.
Toshkent shahrida 14-oktabr kuni o‘tgan Hukumatlararo komissiya va Ishbilarmonlar kengashining navbatdagi yig‘ilishlarining samarali natijalari, ular doirasida yangi bitim va shartnomalar imzolangani yuksak baholandi.
"Yashil" energetika, qishloq xo‘jaligi, elektrotexnika, ko‘chmas mulk, mamlakatimiz hududlarida infratuzilmani modernizatsiya qilish va boshqa ustuvor yo‘nalishlardagi loyiha va tashabbuslarni tez fursatda amalga oshirishga alohida e’tibor qaratildi.