TOShKENT, 2 okt – Sputnik. “Xorijdagi rossiyalik o‘qituvchi” loyihasi doirasida “Rus tili — millatlararo muloqot va do‘stlik tili” mavzusidagi videoanjuman o‘tkazildi. Bu haqda loyiha matbuot xizmati xabar berdi.
Ta’kidlanishicha, anjumanda O‘zbekiston, Misr, Qozog‘iston va Tojikiston maktab o‘quvchilari ishtirok etishgan.
Russkiy yazik – yazik mejnatsionalnogo obsheniya i drujbi
© Foto : Proyekt "Rossiyskiy uchitel za rubejom"
Teleko‘prik davomida turli mamlakatlardagi maktab o‘quvchilari o‘zaro real vaqt rejimida muloqot qilib, o‘z yurti, madaniyati, milliy an’analari va urf-odatlari haqida tayyorlagan taqdimotlari bilan o‘rtoqlashgan. Shuningdek, shaxsiy hayotlaridan qiziqarli voqealar va faktlar bilan ham rus tilida bo‘lishishgan.
“Xalqaro teleko‘prik – bu rus tilining bugungi kunda ham xalqlar va madaniyatlar o‘rtasida jonli ko‘prik bo‘lib xizmat qilayotganining yaqqol isbotidir. Til bolalarga o‘rganish, muloqot qilish va do‘stlashishda chegaralarni yengishga yordam beradi”, – deya ta’kidladi tojikistonlik pedagog Anjela Sarkisan.
Tadbir yakunida bunday onlayn-uchrashuvlarni muntazam ravishda tashkil etish bo‘yicha yakdil qarorga kelingani aytildi.
Ma’lumot uchun, “Xorijdagi rossiyalik o‘qituvchi” xalqaro gumanitar loyihasi Rossiya Maorif vazirligi ko‘magida amalga oshirilmoqda.