TOShKENT, 18 sen – Sputnik. O‘zbekiston delegatsiyasi Qalmog‘istonda (Rossiya) bo‘lib o‘tadigan uchinchi buddaviylik forumida ishtirok etadi. Bu haqda forum tashkilotchilari xabar berishdi.
Ma’lumotga ko‘ra, tadbir 25-sentabrdan 28-sentabrgacha davom etadi.
Tadbir Janubi-sharqiy va Markaziy Osiyo mamlakatlaridan, shuningdek, Ispaniya, Germaniya va boshqa davlatlardan kelgan ishtirokchilarni o‘zida jamlaydi. Tashkilotchilarning ma’lum qilishicha, forum dasturi ishbilarmonlik va madaniy qismlarga bo‘lingan.
"Barcha buddaviy mintaqalar ishga jalb qilinganidan va natijalar hozirdanoq ko‘zga tashlanayotganidan xursandman. Shuni alohida ta’kidlash joizki, Rossiya ko‘plab xalqlarni birlashtirgan ko‘p millatli va ko‘p konfessiyali mamlakatdir. Biz buning bilan faxrlanamiz – qanchalik xilma-xil bo‘lmasin, biz chaqiriqlar oldida birgamiz”, – deya munosabat bildiradi Qalmog‘iston rahbari Batu Xasikov.
Eslatib o‘tamiz, O‘zbekiston hududida turli buddaviylik merosi yodgorliklari mavjud. Ular orasida Fayoztepa majmuasi va Ayritomdagi buddaviylik ibodatxonalari bor.