TOShKENT, 8 sen – Sputnik. Futbol bo‘yicha O‘zbekiston milliy terma jamoasi Markaziy Osiyo Futbol assotsiatsiyasi Millatlar kubogi (CAFA Nations Cup) g‘olibi bo‘ldi.
8 sentabr kuni Toshkentdagi yangi “Olimpik” stadionida Eron jamoasiga qarshi bo‘lib o‘tgan uchrashuv 1:0 hisobida yakunlandi. O‘yindagi yagona golga Hojiakbar Alijonov mualliflik qildi.
Futbolchilarga oltin medallar va kubokni prezident Shavkat Mirziyoyev topshirdi. Taqdirlash marosimida FIFA rahbari Janni Infantino va boshqa rasmiy shaxslar ham ishtirok etdi.
Uchinchi o‘rin uchun kechgan bahsda Hindiston O‘mon ustidan g‘alaba qozondi.
“CAFA Nations Cup-2025” musobaqasida 8 ta milliy jamoa ishtirok etdi. O‘yinlar Toshkent va Dushanbe shaharlarida o‘tkazildi.