TOShKENT, 7 sen – Sputnik. Yevrosiyo iqtisodiy ittifoqi (YeOII) doirasida iqtisodiy jarayonlarni 2030 va 2045-yilgacha bo‘lgan davrda yanada rivojlantirish to‘g‘risidagi deklaratsiyani amalga oshirish bo‘yicha yo‘l xaritasi loyihasi muhokama qilindi. Bu haqda Yevroosiyo iqtisodiy komissiyasi (YeIK) matbuot xizmati xabar berdi.
Ta’kidlanishicha, yig‘ilishlar Moskvada Yevrosiyo iqtisodiy komissiyasining integratsiya va makroiqtisodiyot bo‘yicha vaziri Daniyor Imanaliyev raisligida o‘tkazilgan.
Ma’lum bo‘lishicha, uchrashuvlar YeOII mamlakatlari davlat hokimiyati organlari rahbarlarining Komissiya bilan hamkorlik qilishga vakolatli o‘rinbosarlari darajasida, shuningdek, YeIKning tegishli vazirlari ishtirokida bo‘lib o‘tgan.
Ko‘plab muhim masalalar bo‘yicha kelishuvlarga erishilgani qayd etilib, yaqin kunlarda hujjat YeIK Kengashi a’zolariga taqdim etiladi.
Shuningdek, yig‘ilishlar davomida alohida e’tibor talab qiladigan va ko‘rib chiqilishi rejalashtirilgan "Strategiya-2025"ni amalga oshirish masalalari ham muhokama qilingan.
Eslatib o‘tamiz, YeOII doirasida iqtisodiy jarayonlarni 2030-yilgacha va 2045-yilgacha yanada rivojlantirish to‘g‘risidagi "Yevroosiyo iqtisodiy yo‘li" deklaratsiyasi 2023-yil 25-dekabrda YeOII davlatlari prezidentlari tomonidan imzolangan.