TOShKENT, 22 avg – Sputnik. “Shimoliy oqim”larni portlatishda gumon qilinib, Italiyada qo‘lga olingan ukrainalik ilgari Ukraina xavfsizlik xizmatida (UXX) ishlagan. Bu haqda “The Wall Street Journal” gazetasi o‘z manbalariga tayangan holda yozmoqda.
Nashr ma’lumotlariga ko‘ra, qo‘lga olingan Sergey K. zaxiradagi Ukraina Qurolli kuchlari (UQK) kapitani. Bunga qadar u UXXda hamda havo hujumidan mudofaa tizimi jalb qilingan bo‘linmada ishlagan.
Ta’kidlanishicha, Yevropa huquqiy tizimiga binoan Italiya hukumati qo‘lga olingan shaxsni Germaniyaga topshirishi kerak. U yerda unga 15-yilgacha ozodlikdan mahrum qilishni nazarda tutuvchi sabotaj bo‘yicha ayblov e’lon qilinishi kerak.
“Shimoliy oqimlar”dagi portlashlar
Eslatib o‘tamiz, 2022-yilning 26-sentabr kuni Rossiyaning Yevropaga gaz eksport qiluvchi ikkita quvuri – “Shimoliy oqim” va “Shimoliy oqim 2”da portlashlar sodir bo‘ldi. Germaniya, Daniya va Shvetsiya qasddan uyushtirilgan qo‘poruvchilikni istisno qilishmadi. "Shimoliy oqim" operatori "Nord Stream AG"ning xabar berishicha, gaz quvurlari jiddiy shikastlangan va ularni ta’mirlash muddatini belgilashning iloji yo‘q. Rossiya Bosh prokuraturasi xalqaro terrorchilik akti yuzasidan ish qo‘zg‘atdi.