Feruza Iskandarova — Uzbekistan Airways aviakompaniyasining yosh va istiqbolli bort kuzatuvchisi. U ikki ming soatdan ortiq havoda parvoz qilgan, o‘nlab mamlakat va shaharlarni ko‘rgan, eng muhimi esa — minglab mamnun va minnatdor yo‘lovchilarning xizmatida, ularning qulayligi va xavfsizligini ta’minlash uchun u har safar reysga chiqadi.
Feruza aviakompaniyadagi ikki yarim yillik faoliyati davomida yuqori darajadagi kasbiy mahorat va mas’uliyat ko‘rsatib, yaqinda bort kuzatuvchi-brigadir bo‘ldi.
“O‘zbekistonning asosiy aviakompaniyasida ishlash juda mas’uliyatli, chunki bizga nafaqat o‘z yurtimiz, balki boshqa mamlakatlardan yo‘lovchilar ham ishonadi. Uzbekistan Airways’da qulay va samarali ishlash uchun barcha sharoitlar yaratilgan. Bundan tashqari, biz doimiy ravishda o‘qishni davom ettiramiz — muntazam malaka oshirish kurslariga qatnaymiz, bu kurslar bizga kasbiy jihatdan rivojlanish va sevimli kasbimizda o‘zimizni to‘liq namoyon etish imkonini beradi”, - deydi u.
Feruza aviatsiyadan oldin “Afrosiyob” poyezdida yo‘l boshlovchisi bo‘lib ishlagan, biroq doimo osmonda parvoz qilishni orzu qilgan. Barcha shubhalarni yengib, qat’iy tanlovdan o‘tgach, u Uzbekistan Airways’ga qabul qilindi va endi hayotini aviatsiyasiz tasavvur qila olmaydi.
“Yo‘l boshlovchi — bu men haqimda. Faqat endi — havoda. Ishonchim komil: eng yaxshi ofis — bu illyuminatordan bulutlar ko‘rinadigan maskan” — dedi u.
Bort kuzatuvchisi lavozimiga nomzodlarga ko‘plab talablar qo‘yiladi. Bu 18 dan 25 yoshgacha bo‘lgan yosh chegarasi, tegishli bo‘y, vazn va tana vazni ko‘rsatkichi hamda boshqa ko‘plab mezonlardir. Ular maxsus tibbiy komissiya — TUEK dan o‘tishlari shart.
Bo‘lajak bort kuzatuvchisi davlat, rus va ingliz tillarini erkin darajada bilishi, keng bilimga ega ekanligini namoyon etishi, O‘zbekiston va jahon mamlakatlarining geografiyasi, tarixi hamda madaniyati bo‘yicha har tomonlama ma’lumotga ega bo‘lishi, stressga bardoshli va muloqotga kirishimli bo‘lishi, birinchi yordam ko‘rsata olishi lozim.
Tanlovdan o‘tgach, bo‘lajak bort kuzatuvchilari o‘quv-mashg‘ulot markazida ta’lim oladilar, u yerda nazariy va amaliy mashg‘ulotlarda ishtirok etadilar. Shuningdek, bu yerda bortda xavfsizlikni ta’minlash, birinchi tibbiy yordam ko‘rsatish va yo‘lovchilarga xizmat ko‘rsatish bo‘yicha mashqlar o‘tkaziladi.
Shundan keyingina, bort kuzatuvchi-instruktor nazorati ostida uzoq kutilgan birinchi ish reysiga chiqiladi. Feruza uchun bu har jihatdan birinchi edi: Uzbekistan Airways’ga kelgunga qadar u umuman samolyotda uchmagan.
“Parvoz juda qulay o‘tdi, hamkasblarim menga yordam berishdi, amalda ishlar qanday qilinishini tushuntirishdi. Chunki samolyotda bo‘lganingizda, barchasi o‘quv paytidagidan boshqacha bo‘ladi. Va men hamkasblarimdan juda minnatdorman, chunki ular barchasini batafsil tushuntirishdi”, — deydi Feruza.
Samolyotda bort kuzatuvchilari yo‘lovchilarning xavfsizligi va qulayligini ta’minlash uchun javobgardir. Bu vazifalar xavfsizlik bo‘yicha yo‘riqnomalar o‘tkazish, favqulodda-qutqaruv jihozlarini tekshirish, yo‘lovchilarga xizmat ko‘rsatish va zarur hollarda birinchi tibbiy yordam ko‘rsatishni o‘z ichiga oladi. Shuningdek, ular bortdagi tartibni nazorat qiladilar va har qanday ziddiyatli vaziyatni hal qilishga doimo tayyor turadilar.
Aviakompaniya vakili sifatida, bort kuzatuvchisi har doim xushmuomala va ochiqko‘ngil bo‘lishi kerak. Yuklamalar, tartibsiz ish jadvali va stresslar - osmondagi ishning o‘ziga xos xususiyatlaridir.
Feruza o‘z amaliyotida duch kelgan nostandart vaziyatlar, ish jarayonida muloqot qobiliyati va har bir yo‘lovchiga yondashuv topa olishning qanchalik muhimligi hamda doimiy takomillashuvga ilhom beruvchi omillar haqida batafsil Sputnik O‘zbekiston videosida gapirib berdi.