TOShKENT, 10-iyul — Sputnik. O‘zbekistonda ilk bor sofligi 99,9 foiz reniy metalli eksporti yo‘lga qo‘yildi, deya xabar berdi Texnologik metallar kombinati xabar berdi.
“TMK Estoniyaning “VLCor Baltic OU” kompaniyasi bilan imzolangan shartnoma asosida ilk bor reniy metallini eksport qildi. Bu O‘zbekistonda reniy metalli eksportining amaldagi boshlanishini anglatadi”, — deyiladi xabarda.
Reniy — murakkab texnologiyalar, aerokosmik sohalar va yuqori haroratli superqotishmalar ishlab chiqarishda jahonda tan olingan strategik metall hisoblanadi.
TMK tomonidan 2025-yil yarim yillik davomidagi jami eksport hajmi — 21,3 mln dollar (118% o‘sish) ni tashkil etadi.
Eslatib o‘tamiz, shu yilning aprel oyida respublikada reniy metalli sanoat miqyosida ishlab chiqarish yo‘lga qo‘yildi. Hozirda O‘zbekiston texnologik metallar kombinatida reniyni ishlab chiqarish bo‘yicha uchastka tashkil etildi va xorijdan zamonaviy texnologik uskunalari o‘rnatildi.
Reniy xom ashyosi Mis eritish zavodi va mahalliy sanoat korxonalaridan keltirilmoqda. OKMK tomonidan endi yiliga 3 tonna reniy ishlab chiqarish ko‘zda tutilgan.